Angela Ahrendts adianta que o Apple Watch sairá á venda en primavera
luns, 3 de novembro do 2014
Moita
é a expectación polo lanzamento do smartwatch
de Apple, en boa medida polas grandes incógnitas sobre o novo wearable da compañía de Cupertino, como
os distintos prezos, as características finais e as datas de comercialización,
estando cada vez máis claro este último aspecto, pois aínda que estaba claro
que non sería até 2015 cando o produto sairía á venda, o panorama poderá mudar
moito entre a venda do reloxo nas primeiras semanas do ano a de facerse preto
do verán. As últimas novas que temos a este respecto parten dunha videomensaxe
de Angela Ahrendts, responsable de consumo de Apple, aos traballadores da
compañía, na que os insta a gardar enerxía para a campaña de Nadal, detallando
que tras a mesma chegará o Aninovo Chinés (en febreiro) e, “o
lanzamento dun novo reloxo en primavera”. Deste xeito entendemos que o
Apple Watch chegaría como moi cedo a finais de marzo, de xeito que non se
cumpriría o desexo de moitos de que o trebello estea dispoñible a tempo para o
Día dos Namorados.
O lanzamento do Apple Watch estaría a ser máis imporante para a compañía de
Cupertino do que poderiamos pensar nun primeiro momento, pois supón cambios nas
estratexias de venda de Apple e tamén precisa de procesos formativos para os
traballadores da Apple Stores para que poidan atender correctamente aos
consumidores sobre produtos que nunca venderan antes, e nos que os distintos
modelos, tamaños e correas suporán unha diversidade de produtos inédita no
catálogo da empresa.