Ames entrega os premios Galetiktokers 2021 nunha gala presentada por Fátima Pego

Onte entregáronse na Casa da Cultura de Bertamiráns (Ames) uns galardóns impulsados polo Concello de Ames destinados a reivindicar as capacidades creativas e participativas da rede social TikTok, o talento da mocidade e, tamén, o impulso do galego no ámbito online. Estamos a falar dos Premios Galetiktokers, que recoñeceu os seguintes vídeos da mocidade local e galega: Redescubre a música galega, Minuto Breogán, A xente e os seus vicios e E inglés, si? As persoas premiadas déronse a coñecer no transcurso dunha gala que contou coa presenza das persoas participantes, dos membros do xurado e de Fátima Pego que actuou como presentadora e, acompañada do DJ Son1c, como cantante.
Asistiron tamén o alcalde de Ames, Blas García, e a concelleira de Mocidade e Normalización Lingüística, Escarlata Pampín.
Tanto nas súas intervencións como nas do resto dos convidados/as púxose de manifesto a “necesidade de encher as redes de contidos en galego como xeito de valorizar e de perpetuar a lingua ao tempo que aproveitamos as vantaxes dunha marca de noso que nos fai únicos e diferentes”.
Lembraron que o certame ten a súa orixe nun esforzo conxunto dos departamentos de Mocidade e de Normalización Lingüística e que nesta segunda edición abriuse o concurso a quen quixera participar, o que provocou que se recibisen propostas doutros moitos concellos galegos.
A festa contou coa música en directo da cantante e presentadora Fátima Pego e DJ Son1c e co humor de dous dos membros do xurado: Gabi G e Leti da Taberna. A tamén xurado, Lucía Rodriguez, subiu ao escenario para sinalar “a dificultade de elixir aos gañadores dada a calidade dos traballos presentados”. Todos os traballos puideron verse no transcurso da gala.
Na categoría de 13 a 16 anos obtivo o premio do público Redescubre a música galega, un traballo presentado polas amesás Lorena Viñas Lafuente, Emma Arias Blanco e Zulfa Muiño Vilela. O premio do xurado foi para Minuto Breogán dos vigueses Ismael Barreiro e Jerome Alonso. Cómpre salientar que nas votacións de Instagram ambos os dous traballos obtiveron os mesmos likes, 345, e que a organización do certame tivo que abrir un novo prazo de votacións para o desempate.
Na categoría de máis de 17 anos, o público outorgou o premio a E inglés, si? da compostelá Antía Villaverde.
Pola súa banda, o xurado concedeu o premio á peza A xente e os seus vicios da fisterrá Alba Castro.
A concelleira de Mocidade e Normalización Lingüística, Escarlata Pampín, gabou a esencia do certame de “ir cos tempos levando a nosa lingua ás redes” e agradeceu a todas as persoas que traballaron a prol do certame desde as técnicas de Normalización e Mocidade, ás persoas que interviron na gala e a todas as persoas que participaron cos seus traballos”.
Pola súa banda, o alcalde de Ames, Blas Garcia, declarouse “defensor e usuario das redes sociais desde o seu inicio” e manifestou a “gran utilidade que teñen tamén para espallar o uso do galego”.
Nesta edición presentáronse 22 propostas que enviaron 32 candidatos/as. A temática das pezas foi variada, aínda que a lingua e a cultura galega destacaron como foco principal dos tiktoks das participantes.
Os galardóns do certame Galetiktokers suman 600 euros, repartidos entre as dúas categorías. Cada un dos premiados recibiu 150 euros.