Amazon permite mercar no supermercado Día no contorno da Coruña

mércores, 5 de maio do 2021 Marcus Fernández

Amazon está a ampliar xeograficamente os seus servizos de venda de produtos de supermercado, que veñen de desembarcar en Galicia a través da cidade da Coruña, na que dende hoxe teñen operativa a súa tenda da cadea Día, ou sexa, que os coruñeses que estean subscritos a Amazon Prime poden realizar pedidos a un supermercado local de Día vía web, podendo elixir unha franxa de 2 horas para a entrega dos produtos solicitados e podendo gozar de portes de balde para pedidos de máis de 50 euros (para pedidos inferiores o envío custará 3,90 euros, sendo o pedido mínimo de 15 euros).
O servizo de entrega de produtos dos supermercados Día a través de Amazon está dispoñible actualmente en 10 cidades españolas, e continuará a espallarse xeograficamente nos vindeiros meses. No caso coruñés ofrece máis de 5.000 artigos de marca Día e outros de grandes marcas, sen esquecer produtos frescos, refrixerados e, en definitiva, os produtos que habitualmente podemos atopar nun supermercado.
Ante a imposibilidade de poder comprobar en tempo real a dispoñibilidade dos produtos pedidos a través de Amazon a tendas de Día, a plataforma electrónica tamén ofrece a posibilidade de seleccionar produtos alternativos ou incluso de facilitar a comunicación co cliente por teléfono no momento de preparar o pedido para poder escoller alternativas para completar o pedido realizado ou para resolver dúbidas.
Cómpre lembrar que a alianza entre Amazon e Día é só unha das liñas do xigante do comercio electrónico na venda de produtos de alimentación e fogar, xa que tamén ten previsto espallar por todo o territorio español Amazon Fresh durante o presente ano.

PUBLICIDADE