Alumnado egresado do Campus de Ferrol presenta o videoxogo Renegade Jammer no BCN Game Fest

Alumnado egresado do Master en Deseño, Desenvolvemento e Comercialización de Videoxogos, titulación que se imparte na Escola Politécnica de Enxeñaría de Ferrol (EPEF), presenta o xogo Renegade Jammer na oitava edición do BCN Game Fest que está a ter lugar en La Farga de Hospitalet de Llobregat (Barcelona), desde este venres 10 ata o domingo 12 de outubro.
O evento contará, ao longo dos tres días, con máis de 15.000 visitantes e preto de 200 compañías do sector. Trátase, segundo lembran fontes da UDC, “do evento gamer de referencia no sur de Europa”.
Detrás deste proxecto, nado como Traballo Fin de Máster (TFM), están os antigos estudantes do Campus Industrial de Ferrol, Andrea Alonso, Álvaro Martos, David Muradás, Gael Alberto Quintela, Andrea Salgado e Manuel Sanjurjo. Xuntos conforman Team Kaulu, o estudo que está a desenvolver este xogo de plataformas 3D no que a súa protagonista, xunto con outros compañeiros e compañeiras de viaxe, terá que irromper nas instalacións que esta compañía, dedicada ao estudo das mutacións xenéticas con fins pouco éticos, ten en varias galaxias co obxectivo de boicotear os seus sistemas informáticos e deter a súa actividade.
Dende o Campus de Ferrol lembran tamén que non é a primeira vez que o estudo Team Kaulu presenta Renegade Jammer en público: en novembro de 2024 participaron na ExpOtaku, en ExpoCoruña e, máis recentemente, a mediados de setembro, no Lérez Up de Pontevedra onde conseguiron o Primeiro Premio ao Mellor Xogo Indie.