Alumnado do Centro de Audiovisuais lucense, premiado nun concurso de curtas de Netflix e Turespaña
mércores, 29 de xuño do 2022
Un
grupo de
alumnos e alumnas do Centro de Formación Audiovisual da Deputación
de Lugo vén de gañar un dos cinco premios do I Concurso Cómo
dirías que es España sin decirlo, convocado pola plataforma
de contidos Netflix e o organismo estatal Turespaña. O proxecto,
titulado Amor viajero. Un viaje para el recuerdo foi premiado
con 7.000€, que deberán destinase a producir, filmar e
postproducir a curta antes de que remate este ano 2022.
Lucas
Alba, Mario Bello, Miguel Bouzas, Sara Casanova, Erea Díaz, Mateo
Longa e Paula Vilariño presentaron o pasado 14 de xuño a súa idea
a responsábeis de Netflix e Turespaña nun pitch no que
contaxiaron o seu entusiasmo e prepararon deste xeito o posterior
recoñecemento, xunto con centros de Langreo, Zaragoza, L’Hospitalet
e Granada.
Segundo
informa a Deputación lucense, ao longo do curso os estudantes
compatibilizaron as súas obrigas académicas coa elaboración dun
proxecto que se adaptase ás bases do concurso organizado por Netflix
e Turespaña, unha proposta que “debía plasmar a esencia de
España, das súas xentes, paisaxes, tradicións ou gastronomía,
amosando formas de vida sustentábeis que coiden o medio ambiente, a
economía e o patrimonio socio-cultural”. Os alumnos, supervisados
polo seu titor, Hugo Fernández, escribiron unha historia na que,
ademais do aspecto turístico, abordaron outros asuntos, como o
alzhéimer e a visibilidade LGTBI.
Amor
viajero conta a historia de Eugenia, unha anciá que comeza a ter
problemas de memoria. Cando a súa neta atopa unas vellas fotografías
da súa mocidade parece recuperar a lucidez. Como terapia, a rapaza
decide percorrer os destinos das fotografías replicándoas para
estimular os recordos da súa avoa, entre os que xurde un amor de
xuventude.