Activision separa aos xogadores de Windows 10 e Steam en Call of Duty: Infinite Warfare

martes, 8 de novembro do 2016 Marcus Fernández

O pasado venres saíu á venda o xogo Call of Duty: Infinite Warfare, un dos títulos máis esperados de cara á campaña de Nadal, que vén de estrearse cunha sorpresa moi molesta, xa que a súa versión para PC pode adquirise a través de dúas plataformas dixitais distintas (a tenda de Windows 10 e a tenda de xogos descargables de Steam) e por motivos difíciles de comprender Activision decidiu que os modos multi-xogador en liña de ambas plataformas estivesen segregados, ou sexa, que os xogadores de Windows 10 e os de Steam non poden compartir partidas, o que neste caso resulta gravísimo, xa que o punto forte deste tipo de xogos son os seus modos en liña.
Dado que os xogadores están afeitos a mercar este tipo de xogos en Steam, a consecuencia é evidente: resulta case imposible xogar en liña na versión para Windows 10 ante a falta de xogadores. Iso está levando a Microsoft a devolver os cartos a todos os que mercasen o xogo na súa tenda e que así o soliciten, para poder volver mercar o xogo en Steam, aínda que non faltan os que piden o reembolso e optan por facerse con Battlefield 1, xa que o desencanto ante a nova ambientación futurista da franquía é evidente, e o número de xogadores en liña a través de Steam está a ser moi inferior que en entregas anteriores (nin sequera está entre os 40 xogos con máis usuarios en liña a día de hoxe).

PUBLICIDADE