Acer fai público o primeiro tablet de 8 polgadas con Windows 8

O rumoreado Acer Iconia W3 confírmase como un produto real, e na propia páxina web do seu fabricante figura como o primeiro dispositivo con pantalla de 8 polgadas con Windows 8, polo que sería unha boa opción para quen queira ter en formato tablet un ordenador completo que poder transportar comodamente e utilizar con grande versatilidade. O Iconia W3 inclúe Microsoft Office, polo que facilita o uso de ferramentas como o Word, Excel ou PowerPoint en mobilidade, conta cun teclado físico opcional que pode facer de base do tablet para o seu uso no escritorio, integra micro SD para poder achegarlle ficheiros externos, pode conectarse a pantallas externas a través de micro HDMI e incluso conta con conectividade micro USB 2.0 e Bluetooth 4.0.
Este tablet de Acer funciona cun procesador Intel Atom Z2760 (o que permítelle operar con Windows 8 Pro), 2 Gb de RAM e 32/64 Gb de almacenamento interno, a súa pantalla de 8,1 polgadas ten un formato de 16:10 cunha resolución de 1.280 x 768 píxeles, e presume de ter autonomía dabondo para poder reproducir vídeo a 720p durante ata 8 horas.
Dende Amazon colocaban o prezo deste tablet con Windows 8 en 379,99 dólares (295,46 euros), o que podería supor a chave do seu futuro éxito, pois sería unha magnífica alternativa aos tablets actuais, pois cun prezo lixeiramente superior ao dun iPad mini achegaría un dispositivo que podería funcionar como un ordenador completo. É moi posible que chegue ao mercado o mes que vén.