Ábrese o rexistro para a beta de Titanfall para Xbox One e PC
mércores, 12 de febreiro do 2014
Para quecer motores de cara ao lanzamento de Titanfall
para Xbox One e PC o vindeiro 13 de marzo, o agardado primeiro xogo de Respawn
Entertainment (compañía fundada polos principais responsables do éxito actual
da franquía Call of Duty) veñen de abrir o rexistro da
súa beta para PC e Xbox One, o que permitirá probar varios dos seus modos
de xogo en liña a partir do vindeiro día 17. Os interesados en poder gozar do
xogo de xeito anticipado (proceso que axudará a configurar axeitadamente os
seus servidores e equilibrar o xogo de cara ao seu lanzamento) deben inscribirse antes da unha da madrugada do
vindeiro sábado.
Aínda que a beta do xogo non precisa da súa reserva previa (como acontece
noutras ocasións) é preciso contar cunha conta de usuario en Origin (a
plataforma de xogo en liña de Electronic Arts) para poder participar nesta fase
de probas do xogo.
A beta de Titanfall incluirá os modos
de xogo Attrition (os equipos gañan eliminando a todos os pilotos, titáns e
soldados do bando contrario), Hardpoint Domination (típica misión de capturar a
bandeira) e Last Titan Standing (gaña o equipo que conserva algún titán en pé).
A versión para Xbox 360 do xogo carecerá de beta, está a ser desenvolvida por
Bluepoint Games e non chegará ao mercado ata o 28 de marzo.
Vídeo promocional da beta de Titanfall
