Aberta a inscrición das formacións en mercadotecnia en liña e innovación aberta do Coworking Dixital Compostela

venres, 2 de xuño do 2023 S. P.

O programa de formación do Coworking Dixital CCompostela organiza os días vindeiros unha serie de actividades capacitadoras nas que abordará os aspectos máis estratéxicos da innovación e a dixitalización para impulsar o crecemento das pemes e emprendedores. As persoas participantes poderán afondar na solución de retos empresariais e en casos prácticos guiadas por metodoloxías baseadas na técnica do Desing Thinking.
Ademais, en diferentes sesións prácticas os participantes darán os seus primeiros pasos no deseño dunha web efectiva e enfocada a dar valor ao negocio, mergullándose nas ferramentas para facer visíbeis eses negocios nas redes e en planificar campañas dixitais para darlles maior visibilidade.
Para participar neste programa de formacións (presencial e online) é necesaria inscrición na web do Coworking.
O programa conta con expertos en cada área que ten unha ampla experiencia.
Lolo Rey é un consultor externo especializado en mercadotecnia dixital, eCommerce, analítica web e estratexia dixital con case 20 anos de experiencia que traballou para empresas como Telefónica, Adobe, Michelin e Nokia, entre outras. Foi director de coworking na Escola de Organización Industrial (EOI) onde asesorou e achegou mentoring a máis de 100 proxectos de emprendedores.
María Sáez Fernández é enxeñeira industrial e especializouse no marketing de buscadores e a visualización en liña, áreas nas que leva máis de 14 anos traballando. Conta cun mestrado en Xestión de Sistemas de Información da Glasgow Caledonian University e colaborou con empresas como Aggreko, onde desempeñou o rol de coordinadora de mercadotecnia en liña, liderando estratexias dixitais.
Pola súa banda, Caty Casal leva máis 15 anos na xestión de subvencións e axudas para impulsar o crecemento das empresas. Fundadora de PEMES Activa desde onde realiza un asesoramento integral e servizos de xestión a pequenas e medianas empresas. Dispón dun profundo coñecemento en diferentes áreas de subvención como emprendemento, investimentos en maquinaria, aforro e eficiencia enerxética, TIC, internacionalización, igualdade e conciliación, entre outras.
Ángeles Gestal é licenciada en CC Económicas e conta con formación en Tecnoloxías de Información (TI) para os negocios, xestión con proxectos áxiles e metodoloxías PMI. Ten máis de 20 anos de experiencia e na actualidade exerce como consultora no ámbito da xestión económica-financeira, a análise de viabilidade de startups e a análise de fontes de financiamento.
Pablo López é licenciado en Ciencias Económicas e Empresariais pola Universidade da Coruña. É mestrado Executivo en Dirección e Administración de Empresas pola Universidade Pontificia de Comillas ICADE ICAI, mestrado de asesoramento fiscal pola CEF e posúe o certificado en adestramento individual e de equipos coa International Coach Community.

PUBLICIDADE