AMTEGA activa a edición Júnior do programa Tecnólogo por un día
luns, 19 de abril do 2021
A
Axencia
para a Modernización Tecnolóxica de Galicia (AMTEGA) pon en marcha
este 19 de abril a edición Júnior do seu programa Tecnólogo por
un día, destinado a familiarizar á poboación xuvenil da
nosa terra co día a día dunha ou dun profesional das novas
tecnoloxías da información. Esta edición está dirixida a
estudantes de 12 a 14 anos. Os nenos e nenas interesados en
participar poderán inscribirse ata o vindeiro 28 de abril desde os
centros educativos, a través do persoal docente.
Metodoloxía
de inscrición
Segundo
indica AMTEGA, no momento da inscrición, o alumnado poderá elixir
as súas preferencias entre as 30 prazas dispoñíbeis e as
asignacións realizaranse posteriormente aplicando o resultado dun
sorteo. Serán as empresas quen contacten co alumnado posteriormente
para concretar a data e o horario da sesión que se desenvolverán ao
longo do mes de maio.
Media
ducia de empresas participantes
Nesta
ocasión, colaboran no programa profesionais voluntarios de seis
empresas TIC galegas: Dos Espacios, Inetum, Satec, Sivsa, Sixtema e
Tecalis. Estas firmas tecnolóxicas desenvolverán “distintas
sesións online nun formato áxil e dinámico para achegar as
profesións dixitais ás persoas máis novas”, informa a axencia
que dirixe Mar Pereira, engadindo que nesta quenda acollerase ata 30
participantes, “que poderán somerxerse a través das distintas
sesións en liña na realidade destes traballos e adentrarse nos
proxectos, ferramentas e/ou coñecementos que empregan as persoas que
traballan no sector no seu no día a día; resolver dúbidas
vocacionais que poidan xurdir; ou coñecer cales son as capacidades
que demandan as empresas neste eido”.
No
espazo web do
programa atópase dispoñíbel toda a información, así como o
modelo de autorización necesario para participar na actividade.