AIMEN botará man da intelixencia artificial para impulsar a fabricación de compoñentes ceibes de defectos
mércores, 11 de febreiro do 2015
O Centro Tecnolóxico
AIMEN, emprazado no Porriño, vai
desenvolver un sistema para incrementar ao máximo a calidade na
fabricación de compoñentes de motor e aeronáutica. Con este
sistema de control, impulsado a través do proxecto europeo MAShES,
reduciranse a cero as devanditas eivas industriais. A ferramenta
resultante, equipada con técnicas avanzadas de análise da imaxe e
intelixencia artificial, permitirá capturar a moi alta velocidade
imaxes multiespectrais (imaxes simultáneas no rango visíbel e o
infravermello) do proceso de fabricación. Máis en detalle, será
quen de ver até no máis mínimo detalle a distribución de
temperatura dos elementos “con independencia dos materiais a
procesar”.
Isto, sinala AIMEN, non
era viábel até o de agora e supón ceibar o camiño para o
desenvolvemento de ferramentas de control e seguimento máis
eficaces.
Segundo informa a centro
galego, a partir destas medicións e en combinación con outras
variábeis (como a xeometría do material, a textura superficial e a
velocidade), MAShEs significará a integración dun sistema de
seguimento en tempo real dos diferentes parámetros que definen os
procesos (potencia, velocidade, modulación, etc.) e co fin de
eliminar a aparición de defectos. A maiores, empregaranse técnicas
baseadas en intelixencia artificial que permitirán a
autoreconfiguración do sistema ante cambios no traballo industrial
e/ou nos materiais empregados, “o que dotará de flexibilidade ao
sistema e mellorará a calidade do produto final”.
Con este proxecto
reducirase até nun 80% o tempo destinado á configuración da tarefa
de fabricación e até nun 25% o destinado á execución, “levando
practicamente a cero os defectos de fabricación”, sinala AIMEN,
que tamén apunta que MAShES fornecerá á industria a posibilidade
de acadar a chamada “fábrica cognitiva” (baseada en intelixencia
artificial) e operada en rede, o que vai contribuír a importantes
aforros en enerxía e uso de materiais.
Cun orzamento de 3,67
millóns de euros, MAShES prolongarase até novembro de 2017, saíndo
á luz as versións comerciais dos sistemas nun prazo de 2-3 anos
despois da finalización do proxecto.