AGESTIC impulsará o Camiño Primitivo polo vieiro dixital
luns, 16 de setembro do 2019
- Un treito do Camiño Primitivo achegado por The Travel Magazine
AGESTIC,
a Asociación Galega de Empresas TIC, vén de pór en marcha unha
iniciativa pada divulgar o Camiño
Primitivo de Santiago, o que está vertebrado por Lugo e a súa
provincia, dende a innovación e as tecnoloxías. O obxectivo da
entidade é darlle a meirande proxección ao itinerario, tendo en
conta os importantes tesouros da súa paisaxe histórica, cultural,
ambiental, turística e tecnolóxica.
As
actividades de impulso e visualización terán lugar na propia cidade
da Muralla, buscando a participación de todos os concellos
implicados a través das canles municipais informativas, tanto nos
espazos de Internet públicos e privados, como nos blogs que tratan o
Camiño, como nas redes sociais que serán creadas baixo o nome Lugo
Centro do Camiño Primitivo.
O
proceso implicará a apertura dun rexistro de membros, cidadáns dos
concellos, asociacións culturais e amigos dos itinerarios xacobeos,
entidades sociais, asociacións empresariais, rurais e cidadás.
Todas elas serán convidadas a contribuír ao proxecto coas súas
ideas e opinións, sendo “as protagonistas finais da iniciativa”.
As
xornadas celebraranse en locais da Casa do Saber.
O
día 18 de outubro haberá unha xornada de participación cidadá, en
horario de 16.00 a 20 horas, con dúas mesas redondas: a primeira
tomándolle o pulso á opinión da sociedade sobre proxecto e a
segunda á dos concellos.
O
día 19 celebrarase unha xornada de expertos no Camiño Primitivo e
en tecnoloxías dixitais, de 10.00 a a 14.00 horas, tamén con dúas
mesas redondas: a primeira sobre patrimonio e cultura no Camiño
Primitivo e a segunda sobre tecnoloxías e economía. O obxectivo
desta actividade aberta a toda a cidadanía e as entidades sociais é
promover o coñecemento e a visibilidade do itinerario lucense
botando man das tecnoloxías dispoñíbeis e achegar solucións para
iniciativas dirixidas a mellorar a experiencia dos peregrinos e dos
turistas en xeral ao abeiro das ferramentas dixitais.
Asemade,
trataranse aspectos como o estado do itinerario e as medidas
axeitadas para fomentar publicamente o maior coñecemento do Camiño
Primitivo de Santiago, ademais de analizar outros aspectos de
interese como a restauración do patrimonio, o acondicionamento, a
conservación, a seguridade viaria, a repercusión social e
económica, etc. A maiores, elaboraranse dúas enquisas que
permitirán tanto a peregrinos como a cidadáns avaliar o estado do
Camiño Primitivo de Santiago ao seu paso pola provincia de Lugo e
filmaranse en vídeo as xornadas para a posterior publicación en
redes sociais.