A youtubeira Isa Shopaholic ofrece este sábado en Carballo un obradoiro sobre redes sociais
venres, 21 de febreiro do 2020
A
youtubeira galega Isa Shopaholic, referente comunicativo
nas redes sociais en materia de tendencias culturais e defensa do
galego, vai estar este sábado 22 de febreiro en Carballo, a partir
das 11.00 na Biblioteca Rego da Balsa, para ofrecer un obradoiro
sobre comunidades dixitais, poñendo o foco nas posibilidades que se
abren con Facebook.
Como
lembraremos, Isa é autora do libro O galego mola: Palabras da
miña vida (Hércules de Ediciones), do
que temos falado en Código Cero para dar conta da súa páxina
web, ogalegomola.com, e
doutros labores de divulgación levados a cabo por Isabel Villanueva
(nome verdadeiro de Isa Shopaholic)
dentro e fóra da nosa terra.
Na
cita de Carballo, a veciñanza terá a oportunidade de coñecer
de primeira man “os segredos e reviravoltas da rede social máis
veterana e unha das pioneiras das comunidades sociais en Internet a
nivel mundial: Facebook”, segundo informou o Concello, que lembra
que as prazas son limitadas e que cómpre non demorar a inscrición.
Polo
que se refire aos contidos da sesión, tocaranse, entre outras, estas
cuestións: historia de Facebook, tipos de usuarios, como darnos de
alto, medidas en Facebook, uso de diferentes opcións na rede social,
como usar fotos, vídeos e Facebook Live, xestión de grupos,
administración de páxina, como usar as estatísticas das
publicacións, como tirar partido de Instagram, manexo de
recomendacións, etc.
A
cita coa blogueira está organizada pola Concellería de Cultura de
Carballo.
