A web de normalización da língua galega comeza o curso canda os escolares

luns, 14 de setembro do 2009 Raquel Noya

Logo de tres meses de intensas vacacións, máis de 193.000 escolares galegos volveron ás aulas de Educación Infantil e Primaria a pasada semana para dar comezo a un novo curso académico, e con eles, a web dos equipos de normalización e dinamización lingüística (ENDL), dependente da Secretaría Xeral de Política Lingüística da Consellaría de Educación e Ordenación Universitaria, que xa está a traballar en novos contidos de interese para todos o centros de ensino galegos.
Esta web, que na presente tempada incorpora un novo deseño, é o espazo no que os ENDL poden compartir as experiencias e iniciativas levadas a cabo nos seus centros, así como recoller información de utilidade, que vai dende recomendacións para a elaboración do proxecto de dinamización lingüística dos centros ata propostas de traballo para o comezo do curso.
Asemade, a través desta ferramenta en liña, que se pode consultar directamente na web da Secretaría Xeral de Política Lingüística, os ENDL tamén poden obter información sobre blogues de interese, iniciativas para a familia ou recomendacións bibliográficas sobre diversas temáticas como o ensino de alumnado inmigrante.
Política Lingüística puxo en marcha este espazo na Rede, o pasado mes de xuño, co obxectivo de “difundir e axudar a facer máis visible as experiencias dinamizadoras levadas a cabo polos ENDL, onde ademais poden compartir recursos, ferramentas e información”.
Os ENDL, formados por profesorado, representantes dos alumnos e persoal non docente, comezaron a funcionar nos centros de ensino galegos no curso 1990-1991. A súa creación responde ao obxectivo da Lei de normalización lingüística de 1983 de conseguir que os alumnos e alumnas adquiran unha boa competencia nas dúas linguas oficiais de Galicia. Na actualidade, a súa misión central é fomentar o uso do galego nos centros educativos e ter un papel fundamental no deseño, na posta en marcha e na revisión dos programas de planificación lingüística nos centros educativos.

Renovación do boletín sobre novas do galego
O boletín semanal sobre a actualidade da lingua galega que se distribúe a través do correo electrónico tamén vén estrear novo deseño e xa conta con máis de 1.000 subscritores. Para recibilo e estar informado das novidades do galego, pódese realizar a subscrición na páxina web www.xunta.es/linguagalega.

PUBLICIDADE