A web de MeteoGalicia mellora a información de predición por concellos
luns, 25 de maio do 2015
Os servizos de información de MeteoGalicia estrean
hoxe unha nova ferramenta desenvolvida no CiTIUS, que permitirá aos
usuarios da súa páxina web consultar en linguaxe natural as predicións
meteorolóxicas para cada un dos 314 concellos galegos, facilitando a
interpretación dos datos meteorolóxicos e sen precisar da redacción manual
elaborada por expertos como acontece no caso da predición a curto prazo para
Galicia.
GALiWeather
consegue así completar a información gráfica e numérica que presenta de forma
individualizada pro localidade MeteoGalicia, engadíndolle un comentario en
linguaxe natural froito da investigación do proxecto de I+D Descrición lingüística de fenómenos
complexos, que contou co financiamento de MINECO e que recentemente
finalizou no CiTIUS.
- A conselleira de Medio Ambiente, Territorio e Infraestruturas, Ethel Vázquez, presentou as melloras sobre a información meteorolóxica por concellos
Este proxecto contou coa participación de catro investigadores da Unidade de
Sistemas Intelixentes do Centro, xunto con sete expertos de MeteoGalicia, e
consegue presentar un texto equivalente ao que redactaría un meteorólogo á hora
de dar conta da predición meteorolóxica de cada concello galego.
Para xerar as predicións en linguaxe natural, GALiWeather emprega
datos de predición simbólico-numéricos, coñecemento dos expertos meteorólogos e
técnicas de intelixencia artificial que permiten, en primeiro lugar, converter
os datos en descricións lingüísticas básicas, codificadas nunha linguaxe
intermedia; un proceso posterior converte finalmente estas descricións nunha
narrativa en linguaxe natural, expresada en calquera dos idiomas de saída
soportados (español ou galego).
A
web actual de MeteoGalicia permite a consulta de predicións por
concellos, ofrecendo para cada un deles a previsión meteorolóxica a catro
días vista, pero só a través de datos numérico-simbólicos, ás veces difíciles
de entender e resumir para a maior parte dos usuarios. Esta funcionalidade
inclúe información múltiple, como o estado do ceo (nebulosidade e
precipitación), vento e temperaturas, polo que a medida que aumentan os datos
numérico-simbólicos xorde un inconveniente: a falta de predicións en linguaxe
natural que describan estes conxuntos de datos. Sen este tipo de descrición as
predicións resultan menos comprensibles, xa que os usuarios necesitan
inspeccionar cada símbolo por separado, detectar que fenómenos son relevantes e
cando se van a producir. A inclusión de GALiWeather nos sistemas de MeteoGalicia proporcionará
esta información de xeito automático, seguindo os criterios dos expertos
meteorólogos e de forma comprensible para os usuarios
GALiWeather encádrase nas aplicacións denominadas “de conversión de datos
a texto (Data to Text)”, fronte ás cales incorpora innovacións metodolóxicas
importantes, como o tratamento de termos imprecisos, de uso moi frecuente na
comunicación humana, e a xeración de narrativas globais para todo o período de
predición de catro días. Desde o punto de vista meteorolóxico e ambiental, é
nova a incorporación de información acerca do Índice de Calidade do Aire.
- A conselleira de Medio Ambiente, Territorio e Infraestruturas, Ethel Vázquez, e o reitor da USC, Juan Viaño, presentaron as melloras sobre a información meteorolóxica por concellos