A versión virtual do Belén de Begonte recibiu este Nadal 200 visitas diarias

O Centro Cultural José Domínguez Guizán vén de dar por rematada a 50ª edición da iniciativa O Nadal en Begonte, iniciada o pasado 4 de decembro co pregón pronunciado polo bispo de Mondoñedo-Ferrol, Fernando García Cadiñanos. En contraste coa anterior, esta tempada caracterizouse pola presencialidade, en grupos reducidos, rexistrados a través de Internet ou por vía telefónica. Porén a vertente tecnolóxica da iniciativa mantívose, e de feito conseguíronse 12.500 (algo máis de 200 diarias) visitas á páxina web do histórico Belén desde diversos puntos do mundo, sendo maioría os españois e, dentro deles, os galegos. As visitas presenciais (reducidas co fin de garantir a seguridade) foron unhas 14.000 (en dous meses).
A páxina web do Belén funciona a xeito versión virtual do mesmo e de arquivo histórico dixital do nacemento, de feito recolle milleiros de documentos sobre a historia deste nacemento que está a piques de cumprir medio cento de anos de andaina.
A organización da campaña fixo saber “dentro da complexidade da actual situación sanitaria, o desenvolvemento deste tempo do Nadal en Begonte foi totalmente normal, gardando distancias e cumprindo as prescripcións establecidas ao respecto”. Precisamente esa normalidade no desenvolvemento da campaña aconsellou non celebrar o habitual acto público de clausura de actividades e entrega de premios previsto para o último sábado de xaneiro.
A entrega de premios hase efectuar de xeito virtual a próxima semana para os certames de Arte (Oscar Cabana Picado), Xornalismo (Pablo Veiga López-Castelo, Santiago Rodríguez López, Xoán Neira e Ruth Fernández Fernández) e Poesía (Baldomero Iglesias Dobarrio, Xosé Otero Canto, Carlos López Fernández e Xoán Xosé Fernández Abella). Os premios do Certame de Debuxo sobre o Nadal serán remitidos aos centros onde cursan os seus estudos os premiados.