A veciñanza dos barrios históricos de Compostela celebra a chegada da fibra óptica
xoves, 8 de abril do 2021
- Instalación das caixas de fibra óptica nunha imaxe de El Correo Gallego
A
entrada na fase final do despregue de fibra óptica FTTH no centro
histórico de Santiago impulsada polo Concello, AMTEGA e Orange, unha
circunstancia que poría remate a anos de desigualdade en materia de
accesos e servizos na cidade, é sen dúbida unha boa nova para a
cidadanía residente nos barrios beneficiados. Así
o fixo saber a Asociación de Veciños da Cidade Histórica
“Fonseca”.
A
asociación celebrou a noticia destacando que dotar de Internet á
Compostela histórica (onde máis de 2.000 vivendas e negocios xa
poden darse de alta, sempre que teñan o acceso habilitado no
interior do inmóbel) “era unha necesidade que se viña reclamando
de xeito insistente por parte de todos os veciños, comerciantes,
colexio maior e residencias de estudantes, así como por parte dos
profesionais que teñen o seus despachos e mesmo o Arcebispado e o
Arquivo da Catedral, así como os hoteis aquí asentados”.
A
asociación, reflectindo informacións achegadas pola operadora
Orange, encargada dos traballos, lembra que a alta do servizo de
fibra óptica “xa está aberta para o 60% dos inmóbeis do conxunto
histórico, é dicir, para unhas 2.000 vivendas e negocios que xa
dispoñen de acceso a este servizo de telecomunicacións avanzadas,
aínda que tamén existen outros 1.500 edificios aproximadamente onde
xa se desenvolveron os traballos de despregue, pero aínda se atopan
en fase de probas”.
Ademais,
a empresa instaladora explicou á asociación veciñal que o acceso
final da fibra óptica a estas unidades beneficiadas “realizouse de
acordo ás condicións establecidas coas distintas administracións,
que implica que debe realizarse polo interior dos edificios”. En
consecuencia, “aqueles edificios que aínda non teñan habilitado o
acceso para a fibra óptica ao interior non poderán darse de alta
nos servizos de forma inmediata, ata que este acceso estea
executado”.
O
colectivo Fonseca tamén valora os esforzos desenvolvidos para
minimizar a pegada estética. De feito, o plan de despregue iniciado
no verán de 2020 por parte do Concello de Santiago, Orange, Axencia
para a Modernización Tecnolóxica de Galicia (AMTEGA) e a Dirección
Xeral de Patrimonio da Consellería de Cultura, Educación e
Universidade, realizouse empregando caixas de baixo impacto visual
nas fachadas e as canalizacións existentes, para respectar o
patrimonio histórico santiagués.
Para
consultar dúbidas, a Asociación de Veciños da Cidade Histórica
“Fonseca” empraza aos veciños do casco histórico a poñerse en
contacto coa empresa Orange para informarse sobre a cobertura
dispoñible na súa localización, así como sobre as posibilidades
de contratación do servizo de fibra óptica. Poden contactar a
través da web de Orange ou nas diferentes tendas físicas que a
compañía ten en Santiago.