A tenda de Windows 10 recibe 9 xogos de Neo-Geo

Metal Slug é un dos clásicos de recreativa que xa poden mercarse na tenda de Windows 10

Nos últimos días pasou desapercibida a publicación por parte da HAMSTER Corporation dun bo número de xogos da liña ACA NEOGEO para o seu goce baixo Windows 10, que actualmente estaban presentes na tenda dixital para Xbox One, e que agora, sen introducirse no programa Xbox Play Anywhere, poden mercarse para PC, ou sexa, que na tenda dixital de xogos hai dúas versións de cada xogo en función da plataforma para que queiran mercarse a un prezo de 6,99 euros cada un.
Os xogos que orixinalmente saíran nas máquinas recreativas Neo-Geo e que agora están adaptados para correr en ordenadores persoais a través da tenda de Windows 10 son World Heroes, Metal Slug, Fatal Fury, Over Top, NAM-1975, Last Resort, Sengoku, Art of Fighting e The King of Fighters ’94. É de prever que o resto de xogos da colección (que xa suma 47 títulos) reciban paulatinamente o mesmo tratamento, ou sexa, que poidan mercarse indistintamente para Xbox One ou para PC.