A tenda de FX achega O Rei Arturo por 2,95 euros
venres, 13 de xullo do 2012
FX Interactive non cede un centímetro na súa
teima de achegar videoxogos de calidade a un prezo inmellorábel, cousa moi de
agradecer nestes tempos. Máis ben o contrario: a
través da tenda FX Classics Store vén de pór á venda O Rei Arturo por só 2,95 euros, unha oferta exclusiva cun 80%
de desconto sobre a edición internacional do xogo. A maiores, a empresa permite
a descarga, para que tódolos seareiros “se
animen a probar a nova tenda en liña, ate o 31 de agosto”, de Imperivm Civitas, totalmente de balde.
Volvendo ao Rei Arturo dicir que, como se
indica no seu título, céntrase na recreación da lenda artúrica, da historia da
mítica espada de Uther Pendragon e da relación entre Arturo, lexítimo herdeiro
de Britania, e Merlín, o mago que contribuíu a que este subise ao trono. Segundo
apunta FX, o xogo é moito máis que un xogo de estratexia: é sobre todo un
concepto innovador que combina estratexia, rol e maxia “como nunca antes se fixo”. O xogo en cuestión, loado pola crítica
especializada como “unha espléndida
mestura de xéneros que ofrece mil razóns para pasalo en grande”, ten sitio
de seu, para quen queira ampliar información, en Facebook, Twitter e máis en YouTube. Inclúe, como de costume nas achegas de FX,
instrucións e narración en español, manual a cor que serve de guía
pormenorizada, códigos secretos para acadar a vitoria e diario de
desenvolvedores (co creador do xogo amosando o innovador concepto de xogo en
tres vídeos).