A tableta Surface 3 de Microsoft chega a España

Microsoft rematou marzo anunciando a nova tableta Surface 3, que sería unha alternativa máis cativa, lixeira e barata ao Surface Pro 3, e finalmente hoxe saíu á venda en España, aínda que confirmando un prezo que parece desproporcionado, xa que mentres en EE.UU. custa a partires de 499 dólares (444 euros) en España témola por un prezo de a partires de 599 euros, co detalle engadido de que esta tableta non incluiría o stylus de serie, senón que custaría 49,99 euros adicionais, de xeito que a diferencia co seu irmán maior, en vez de ser duns 200 euros, podería limitarse a uns 50 euros (xa que o Surface Pro 3 máis económico puido adquirirse en non poucas ocasións a 699 euros aínda que o seu prezo oficial sexa de 799 euros).
A Surface 3 ten unha pantalla táctil de 10,8 polgadas cunha resolución de 1.920 x 1.280 píxeles, procesador Intel Atom de catro núcleos, soporte de tres posicións, sistema operativo Windows 8.1 e unha autonomía de até 10 horas, e está dispoñible en dúas configuracións diferentes: con 2 GB de RAM e 64 GB de almacenamento interno a un prezo de 599 euros e con 4 GB de RAM e 128 GB de almacenamento interno por 719 euros. Está previsto que nos vindeiros meses teñamos un modelo que inclúa conectividade móbil 4G.
Pode complementarse con accesorios como o mencionado lapis dixitalizador ou cunha funda con teclado e trackpad (que custa 149,99 euros), un protector de pantalla (54 euros) ou unha base que facilita o seu uso no escritorio (229 euros).

Vídeo no que amosan as vantaxes da Surface 3 para estudiantes