A sadense Difoosion estrea un blog sobre o mundo do motor
mércores, 8 de xaneiro do 2014
Difoosion, a
rede de blogs con sede en Sada que conta con espazos na Rede como Xombit, Andro4all,
Applésencia e WinPhone metro, entre outros, está a
acoller un novo caderno de Internet no seu catálogo, Freno Motor, no que pretenden que o usuario
atope consellos prácticos de condución eficiente e avanzada, temas relacionados
co mantemento do coche, consellos sobre todo tipo de situacións, o
funcionamento dos distintos sistemas tecnolóxicos dos automóbiles e probas de
todo tipo de coches e a actualidade máis recente.
Este novo espazo sería a primeira estrea de Difoosion durante 2014, e xa conta
con contidos abondo para saber o que achegará esta publicación dixital nos
vindeiros meses, aínda que cómpre destacar que están abertos a colaboracións,
polo que os interesados en ser editores deste novo caderno en liña poden contactar cos responsables de
Difoosion para entrar no correspondente proceso de selección.
Como vén a ser habitual neste tipo de publicación en liña, aparte de seguirse a
Freno Motor a través da súa páxina web, tamén é posible subscribirse ao seu
fluxo RSS ou seguir a publicación a través dos seus perfís en redes sociais (Twitter, Facebook e Google+).
