A revista Nintendo Power prepara o seu peche
martes, 21 de agosto do 2012
- A Nintendo Power recolleu boa parte da historia dos videoxogos nas súas páxinas durante os seus 24 anos de vida
Temos comentado en numerosas ocasións que as revistas de
videoxogos están a padecer unha profunda crise debido á que a súa audiencia
está a abandonar o papel en favor da web, e tras a desaparición de moitas
cabeceiras a ambos lados do Atlántico, agora sabemos de que tras
24 anos nos quioscos norteamericanos vai deixar de publicarse a Nintendo Power, unha das
publicacións con maior experiencia no sector, que segundo parece deixaría de
contar coa confianza de Nintendo, compañía coa que non renovaría os seus
acordos comerciais, de xeito que veríase abocada a pechar.
Ao parecer, parte do persoal desta publicación transferirase a outras revistas
de Future Publishing como GamesRadar
e MacLife, e aínda que non se coñece
exactamente cando se publicará o seu derradeiro número, o seu editor, Chris
Hoffman, asegura que procurarán que as últimas entregas sexan memorables,
mentres que un dos redactores da revista, Phil Theobald, aseguran que teñen “planeado algo realmente bo para o número
final”.
En 2007 a Nintendo Power conservaba 475.000
lectores, pero ao estar dirixido a un público novo que cada vez está menos
afeito ás publicacións impresas, era inevitable o seu peche, quedando no
recordo as moitas primicias mundiais que recolleron as súas páxinas e que nos
últimos anos tamén serviron de fonte para moitas informacións recollidas na
Internet.