A plataforma de avogados galegos AD quere ceibar de atrancos o chimpo dixital das nosas empresas
xoves, 23 de marzo do 2017
O Hotel Porta do Camiño de Santiago acolleu hoxe a presentación dunha
iniciativa de apoio tecnolóxico-xurídico directamente encamiñada a
simplificar o chimpo das nosas empresas ao mundo dixital, tanto dende
o punto de vista legal como no que atinxe aos aspectos económicos e
temporais (con aforros de até o 30% en ambos parámetros). Falamos
da plataforma Avogados Dixitais (Abogados Digitales), unha
iniciativa que ten a súa razón e ser, en palabras dos seus
creadores, “na necesidade de dar solucións á inseguridade legal
que xera nunha manchea de empresas o descoñecemento das novas
ferramentas tecnolóxicas”. Este baleiro de información,
sinalouse, é hoxe por hoxe un dos principais atrancos á hora de
darmos o salto ao mundo dixital.
Na
presentación fíxose un repaso polos moitos recursos de utilidade
que vai pór en xogo a plataforma Avogados Dixitais (AD). Para
comezar, os aforros de tempo e diñeiro, que poden chegar a unha taxa
do 30% en comparación coas iniciativas de dixitalización que poidan
poñer as entidades por si mesmas. Por certo que isto (a devandita
taxa do 30% e estas garantías legais) é aplicábel non só ás
empresas tradicionais senón tamén ás start-ups e demais
empresas do sector TIC, para as que tamén hai escollos de
desenvolvemento que superar por mor de cuestións de índole legal.
No
acto de hoxe explicouse que este incremento da eficacia e da
efectividade é posíbel “porque AD combina por unha banda a
experiencia, o coñecemento e a profesionalidade no ámbito legal, en
todas as vertentes que atinxen ao empresariado (laboral,
administrativa, fiscal, mercantil...), da man de catro dos máis
importantes despachos de avogados de Galicia e, pola outra, pola
traxectoria e experiencia do equipo da empresa tecnolóxica IOT
Partners”.
Por
certo que os catro despachos galegos que impulsan a plataforma son
Olivares Avogados, Hinrichs Avogados, Iaraz, e APDTIC.
Estes
datos foron achegados por Felipe García e por Álvaro Hinrichs,
socios directores da iniciativa, quen salientaron tamén a importante
vantaxe de contar cunha rede de máis de 25 colaboradores, “co que
podemos traballar asinando a cada cliente un único interlocutor, que
é quen se encarga de organizar a todo o equipo de especialistas ao
seu servizo, sen que o empresario teña que preocuparse de ir de
despacho en despacho”.
Pola
súa banda, María Araújo, socia directora de AD, expuxo algúns
casos reais do devandito aforro de tempo, esforzos e recursos,
estimado como dixemos nun 30%. Puxo como exemplo o caso dunha
hipotética firma innovadora de novo cuño, que para realizar os
devanditos traballos de plena dixitalización tería que asumir entre
2.000 e 2.500 euros o primeiro ano só en cuestións legais, e,
ademais, comunicándose e traballando con múltiples interlocutores
(xestoría, avogado mercantil, civil, laboral, fiscal...); mentres
que “con AD simplificaría os procesos cun só interlocutor e
aforraría un 30% en diñeiro e en tempo”, explicou Araújo. Tamén
amosou o caso hipotético dunha PEME tradicional e que tería que pór
en xogo se quixera habilitar un proxecto de comercio electrónico.
“Para comezar”, dixo, “non tería interlocutores nin sabería
onde acudir para dar cobertura legal ao seu proxecto ou aos conflitos
de reputación da marca”. Porén, engadiu, “con AD non só
reduciría en máis dun terzo do total os seus tempos de xestión,
sen intermediarios, senón que ademais sería quen de mellorar a súa
imaxe de marca, sabendo en todo intre como actuar”.
Apoio
a proxectos sociais con drons
A
equipa impulsora de AD tamén anunciou a súa intención de
implicarse socialmente na nosa terra, por iso, durante este ano 2017,
fornecerá “asesoramento legal gratuíto a todos aqueles proxectos
de drons que se dirixan a nós, e que sexan considerados viábeis e
de interese para a sociedade galega, polo noso comité de
avaliación”. Así o anunciou Paco Salgueiro, o experto do equipo
directivo no sector tecnolóxico, con motivo do lanzamento da
plataforma, quen engadiu que non será o único proxecto social que
se vai a desenvolver.
Proxectos
en marcha
Aínda
que a presentación oficial de AD tivo lugar esta mañá en Santiago,
o equipo que integra esta plataforma ten xa varios proxectos en
marcha. Arestora, de feito, está a negociar coas máis importantes
aceleradoras de empresas de Galicia, así como grandes empresas do
sector legal e tecnolóxico, co fin de axudar en múltiples aspectos
aos proxectos que abrollen dunhas e doutras. Froito disto son
iniciativas como Connecting for Good (a aceleradora de proxectos
emprendedores de índole social de Vodafone e AMTEGA a cuxas novas
firmas AD empresta asesoramento legal durante os seis meses de
aceleración) ou VíaGalicia (a aceleradora do Consorcio da Zona
Franca de Vigo e a Xunta, que asinará un convenio con AD para dar
asesoramento legal aos emprendedores durante o proceso de aceleración
e colaborando, tamén, na auditoría legal das ideas presentadas).