A película en tres dimensións sobre a xira de U2, galardoada por MTV
xoves, 30 de outubro do 2008
O primeiro filme internacional relevante de
National Geographic Entertainment, U2 3D, que
produciu 3ality Digital, vén de ser galardoada como a Mellor Película Musical
nos Premios MTV Latinoamérica celebrado recentemente en...
A longametraxe, que se estreou en España o
pasado día 3 de outubro, xa leva recadados a nivel mundial preto de 20 millóns
de dólares. Ao longo do vindeiro Nadal, amais de continuar proxectándose en
España -nas salas de cine 3D de todo o país-, tamén se estreará en Xapón así
como noutros países asiáticos e europeos.
U2 3D filmouse en América Latina ao longo da xira Vertigo de U2 e é a primeira película rodada en vivo, producida e
proxectada en 3 dimensións dixital. Segundo veñen de apuntar os seus
responsables, “a produción capta de xeito
singular e auténtico a relación íntima que se da entre a banda e o público e
marca un novo estándar na tecnoloxía dixital tridimensional”.
Dirixida por Catherine Owens e Mark
Pellington, e producida por Jon Shapiro, Peter Shapiro e John Modell, entre
outros, U2 3D, converte unha serie de
concertos en vivo de un dos grupos musicais máis eloxiados do mundo nunha nova
experiencia de entretemento que leva aos espectadores de viaxe polas súas xiras
en Sudamérica.
En relación ao premio recibido nos MTV
Latinoamérica, o director executivo do filme, Sandy Climan asegurou sentir “un gran pracer” e estar orgulloso de ter
acadado ese recoñecemento.
Este foi a primeira longametraxe no que os
produtores empregaron a súa tecnoloxía “innovadora”
de 3-D e segundo afirmaron, estaban seguros de que a película gañaría os
aplausos tanto do público como dos críticos “ao revolucionar a cinematografía, sendo o máis próximo a vivir a
enerxía e emoción dun concerto de U2”.
O equipo de produción de U2 3D filmou os
concertos celebrados nos estadios de fútbol de catro países de América Latina:
en México, D.F. (México), en Säo Paulo (Brasil), en Santiago de Chile (Chile) e
en Bos Aires (Arxentina).
En total, foron rodadas máis de 100 horas de
metraxe en sistema dixital 3-D, gravando os temas máis emblemáticos de U2 como Sunday Bloody Sunday, Where the Streets Have
no Name, With or Withourt You ou One, así como os seus éxitos máis recentes
como Beautiful Day, Vertigo ou Sometimes You Can´t Make It On Your Own.