A páxina web de Twitter incorpora o galego grazas á contribución de tradutores voluntarios (ACTUALIZADO)

Dende Twitter anuncian hoxe que, tras engadir o pasado verán á súa páxina web ao catalán e ao éuscaro, agora dan o paso de trasladar esas linguas ás aplicacións oficiais para Android e iOS, á vez que en Twitter.com incorporan o romanés e o galego grazas á colaboración de toda unha comunidade de tradutores que facilitaron que esta plataforma estea dispoñible en máis de 35 linguas.
Lembremos que este avance da nosa lingua en Twitter foi posible en boa medida polas campañas que animaron aos usuarios de Twitter a solicitar a incorporación do galego nesta plataforma (que segue aberta á incorporación de máis linguas) e ás moitas contribucións de voluntarios que propuxeron e votaron as distintas cadeas de texto que compoñen a interface de usuario Twitter a través do Centro de Tradución que continúa aberto ás colaboracións, o que posibilitará que, tras a estrea do Twitter en galego chegue logo a tradución das súas aplicacións móbiles como vén de acontecer co catalán e o éuscaro.
NOTA: No momento de publicar esta información aínda non era posible acceder a Twitter.com en galego (entendemos que a actualización tardará algunhas horas en propagarse polos numerosos servidores de Twitter).

ACTUALIZACIÓN (2:30 horas):

Principia a tradución de Twitter ao latín

No blog oficial sobre o proceso de tradución de Twitter veñen de eliminar a anterior anotación sobre a estrea do galego en Twitter.com para anunciar que aínda que o seu Centro de Tradución conte con 800.000 tradutores voluntarios que falan linguas que van dende o africáner até o galés, non queren pecharse a linguas mortas e comezan a tradución ao latín da súa páxina web, agardando que iso poida servir para que profesores e estudantes practiquen nesta ferramenta para celebrar o uso contemporáneo desta linguaxe clásica (o que dá a impresión que vén provocado polo anuncio da renuncia do papa Bieito XVI, que anunciouse en latín).
Descoñecemos como afectará este novo anuncio ao calendario de lanzamento da versión en galego de Twitter.