A operadora R recibirá o premio Acuntia polo seu esforzo firme contra a fenda dixital galega

O premio Acuntia á empresa galega que aposta polo desenvolvemento de infraestruturas intelixentes de telecomunicacións, outorgado polo Colexio Oficial e a Asociación de Enxeñeiros de Telecomunicación de Galicia (galardón que se vai entregar na XIX Gala das Telecomunicacións de Galicia, prevista para o vindeiro 24 de outubro no Gran Hotel da Toxa), concedéuselle á compañía R, “polo seu esforzo e dedicación en pechar a fenda dixital en Galicia, mediante a instalación de redes pioneiras dotadas de equipamento de última xeración e servizos de gran ancho de banda, que chegan cada día a máis localidades”.
A distinción recoñece tamén “os seus despregamentos en fibra, cable, SPW e vídeo, dende unha visión integrada das IIT, que lle están a permitir ofrecer aos seus clientes un amplo abano de servizos nun tempo récord e por diante dos seus competidores”.
En palabras da operadora, logo de coñecerse a concesión vindeira do galardón, “o obxectivo de R foi sempre o de lograr que Galicia dispuxera das infraestruturas máis avanzadas de telecomunicacións tanto nas localidades grandes, coma nas pequenas e de máis difícil acceso”. Segundo engade a compañía, “esa foi dende sempre a cerna da nosa misión empresarial”. Os traballos despregados neste ámbito remóntanse a máis dunha década. Ademais, en 2010 esta vontade recibiu un pulo fundamental a través da colaboración coa Administración autonómica ao abeiro do seu Plan de Banda Larga (2010-13), que permitiu á empresa “levar a fibra óptica a 193 núcleos de Galicia que, polas súas características orográficas tiñan serias dificultades para ser quen de mergullarse na Sociedade da Información”. A día de hoxe, R está presente nun cento de localidades da nosa xeografía, grandes e pequenas, todas elas gozando xa de 100 Mbps de conexión e, “en breve”, de 200 Mbps para a totalidade da rede da compañía.
Segundo fixo saber o xurado do COETG con motivo deste recoñecemento, a operadora fixo gala, dende a súa orixe, dun compromiso firme por rematar coa nosa fenda dixital. En palabras de R, “este labor resultounos dende sempre imprescindible”, e máis tendo en conta o obxectivo da empresa de posibilitar que todas as galegas e os galegos “puideran acceder en igualdade de condicións á Sociedade do Coñecemento e ás novas tecnoloxías”. E engaden fontes da operadora de cable: “Este de liquidar a fenda é o camiño que cómpre abrir para rematar cunha comunidade de dúas velocidades e acadar, pola contra, altísimas velocidades para unha soa Galicia, aberta, moderna e que sexa quen de competir coas rexións máis avanzadas de Europa e do mundo”.