A oficina turística do Mosteiro de Armenteira súmase á transformación tecnolóxica de Tourist Insisde

Prosegue o espallamento na provincia de Pontevedra do programa de dixitalización turística Tourist Inside, impulsado pola Deputación. Entre os puntos que están a ser obxecto de transformación grazas a este proxecto atópase a oficina de información turística do Mosteiro de Armenteira, en Meis, pertencente á Rede Info Rías Baixas. ata alí desprazáronse a deputada de Turismo, Ana Laura Iglesias, e a tenente de alcaldesa de Meis, Araceli Maquieira, que deron a coñecer as novidades que transformarán esta oficina aproveitando o potencial que ofrecen as últimas Tecnoloxías de Información e Comunicación (TIC).
Segundo fixeron saber, este punto de información buscará “a total inclusión das persoas con dificultades de audición na súa oferta turística ao incorporar un bucle magnético, que lles axudará a desfrutar por completo das visitas guiadas”. A oficina contará tamén no seu interior cunha tableta na que as e os visitantes poderán realizar enquisas de satisfacción. Ademais, a transformación dixital chegará a 10 puntos en distintos lugares do territorio de Meis nos que se instalarán beacons, é dicir, balizas electrónicas que transmitirán información de interese aos móbiles das e dos visitantes a través da tecnoloxía Bluetooth.
Esta oficina, explicaron, mellorará os servizos que ofrece e que xa en 2017 fixérona merecedora da “Q” de Calidade turística. Este distintivo que outorga o Instituto para a Calidade Turística Española (ICTE) e que converte á oficina nunha referencia na atención aos visitantes, dado o grao de cumprimento dos estándares e procedementos certificados.