A nova edición de XGN R Encounter supera a cifra de inscrición do ano pasado
xoves, 11 de outubro do 2018
A
festa informática galega
XGN R Encounter pon en marcha este 12 de outubro a súa décimo
oitava edición,
en Silleda, co obxectivo de superar o número de inscritos, a cifra
de visitantes e o número de actividades (torneos, relatorios,
concursos, presentacións) doutras edicións. O encontro, que vén
novamente da man da Feira Internacional de Galicia ABANCA co respaldo
da Consellería de Política Social e a colaboración e patrocinio da
empresa R, conta este ano con 900 inscritos, fronte aos 800 da
anterior convocatoria.
Terán
o seu centro de operacións na zona Intranet, onde disporán dun
posto para o seu equipo informático con dereito a acampar no
interior do pavillón e tamén a gozaren dun amplo programa de
propostas e torneos exclusivos.
En
palabras da organización, será unha ocasión inmellorábel para
aprender, intercambiar coñecementos innovadores, divertirse e
navegar a unha velocidade de 10 Gbps grazas a R, que despregou o ano
pasado un cable de 120 quilómetros de lonxitude desde Vigo ata o
recinto.
Amais
disto, a party habilitará unha área Extranet para o público
e os visitantes en xeral, á que poderán acceder de balde tanto os
internautas inscritos coma os non inscritos. A previsión é contar
cunha nutrida afluencia de persoas: calcúlase que unhas 1.500 pasen
desde mañá ata o domingo por esta zona da XGN R Encounter aberta ao
público.
Durante
o evento desenvolveranse distintas actividades dirixidas
exclusivamente aos inscritos, como concursos de arte dixital, nas
súas tres vertentes: creación de imaxes dixitais, música dixital e
a programación. Haberá competicións (para que abrolle o talento
creativo dos participantes), obradoiros, conferencias e unha ampla
listaxe de accións para os seareiros do hardware. Entre elas, a
modificación, cambio e personalización dos equipos de cada quen,
“para mellorar a súa estética ou as súas prestacións”,
sinalan os organizadores, que engaden que tamén se dará acubillo a
granxas de impresoras en 3D e a un espazo adicado á robótica
(os talleres Crea R), onde a rapazada poderá introducirse de cheo na
montaxe destes enxeños electrónicos. O programa tamén inclúe unha
charla (Nativos R) dirixida a educadores, pais e avós que non
naceron na era dixital pero conviven co xente que si que o fixo.
Ambas as iniciativas enmárcanse no programa Digitalent da Axencia
para a Modernización Tecnolóxica de Galicia (AMTEGA), do que R
forma parte.
En
total serán máis de 60 as actividades dun programa que permitirá
aos participantes gozar pero tamén formarse.