A nova edición de Vindeira Capital Network xa conta con 8 iniciativas de mercado inscritas
luns, 22 de xullo do 2013
A nova edición de
Vindeira Capital
Network (VCN), máis ampliada en obxectivos e en ámbitos de
acción, está a camiñar a bo paso. De feito, segundo nos contan o
Clúster TIC de Galicia e máis a Plataforma Vindeira, organizadores
do programa, a día de hoxe e co prazo de inscrición aberto até o 6
de setembro, formalizaron
a súa participación oito start-ups. Estes
proxectos empresariais, en virtude do seu achegamento á cuarta
convocatoria de Vindeira Capitral Network,
disporán dunha
oportunidade real (tendo en conta o éxito das anteriores edicións)
de atopar financiamento para as súas respectivas andainas.
Lembrar
que a iniciativa non só está aberta a start-ups de
recente creación, senón tamén a spin-off universitarias
abrolladas ao abeiro dun centro de coñecemento e a
spin-out corporativas
vinculadas a empresas xa afianzadas no mercado e con experiencia.
“Para todas elas”,
informan o Clúster e vindeira, “a iniciativa VCN
constitúe unha oportunidade única de entrar en contacto con
investidores públicos e privados de toda España e atopar
financiamento vía capital risco”. A
maiores, como avanzamos ao comezo deste artigo (aludindo directamente
a unha edición de obxectivos máis amplos e reforzados), a nova
entrega de VCN ábrese a proxectos de múltiples sectores económicos,
non só o sector tecnolóxico-dixital (por tradición o vinculado a
VCN) senón tamén o biotecnolóxico, o audiovisual, o
agroalimentario, o da automoción, ou, en definitiva, eidos de
actividade especialmente ligados ao tecnolóxico e ao coñecemento
innovador en calquera das súas manifestacións.