A marca Lugo é Capital achegará enerxía extra á dixitalización do comercio da cidade
martes, 10 de decembro do 2019
A
semana pasada o Concello de Lugo deu a coñecer un relevante avance
ao servizo do comercio local nas redes sociais. Estamos
a falar da marca Lugo é Capital, que aposta por salientar os
múltiples puntos fortes dos establecementos lucenses a través dunha
identidade única. A idea é que tanto a nivel offline
como dixital os atributos que distinguen o tecido local do comercio
queden sempre á vista e sexan facilmente identificábeis. En base a
isto, Lugo é Capital preséntase como un novo impulso para
facer subir o sector nos buscadores e nas ferramentas do ecommerce.
A
iniciativa xurdiu do traballo entre a área de desenvolvemento local
e emprego que dirixe Mauricio Repetto con colectivos vencellados ao
comercio de proximidade, asociacións, e demais entidades, todas elas
preocupadas polo emprego, por reter o talento en Lugo e por xerar
riqueza no municipio. Segundo informaron Repetto e a alcaldesa Lara
Méndez, en base ao devandito obxectivo compartido traballouse para
unificar criterios a prol da competitividade dos establecementos
buscando a implicación dos propios comerciantes para que se formen e
reciclen e, tamén, “para que aproveiten sinerxías á hora de dar
a coñecer o entorno comercial mediante campañas de publicidade nos
medios de comunicación e redes sociais”.
A
alcaldesa explicou que se “busca representar a un Lugo actual e
moderno cunha imaxe que pretende conectar co público a través dun
deseño moderno no que aparecen emoticonas mesturadas coas letras de
Lugo”. E engadiu Repetto: “Preséntase así como unha ferramenta
coa que o comercio local tradicional poida competir co comercio
online facendo uso das súas armas”. Alén de todo isto, a
campaña busca impulsar un sentimento de pertenza á cidade:
“Queremos ofrecer una imaxe de optimismo e modernidade que facilite
a implicación da poboación de Lugo na supervivencia do comercio
local fronte ao comercio de grandes superficies e online”,
aseverou a rexedora.
Respecto
ás actividades concretas previstas, o Concello anunciou que
desenvolverá “unha estratexia de dinamización, visualización e
posta en valor do pequeno comercio”. A través dela buscarase
dinamizar a cidade e animar a instalación de novos operadores no
centro, dar apoio técnico mediante formación, crear alianzas con
outras entidades, aumentar clientela e facilitar o acceso á
dixitalización do pequeno comercio, entre outras cousas.