A investigación galega activa un hub para poñer o cálculo avanzado ao servizo das pemes

xoves, 17 de marzo do 2022 S. P.

Este 16 de marzo presentouse en Madrid, no Barrabés Growth Space, o proxecto Hub-PET MSO-ED, cuxo obxectivo é achegar ás empresas tecnoloxía matemática punteira feita na nosa terra co fin de axudalas a ser máis competitivas, rendíbeis, eficientes, eficaces, flexíbeis e innovadoras. O hub conta co apoio firme do Centro de Investigación e Tecnoloxía Matemática de Galicia (CITMAga), AIMEN, o CESGA (Centro de Supercomputación de Galicia) e o Basque Center for Applied Mathematics; contándose coa participación de compañías como AIS Group e AnySolution, entre outras. Segundo se fixo saber na presentación, o proxecto “establece conexións entre empresas e mundo académico de maneira dinámica, e fomenta o compromiso e a complicidade mutua”.
Na cita participou a investigadora galega Peregrina Quintela, catedrática de Matemática Aplicada, quen insistiu en que o hub “permitirá pór no mesmo taboleiro de xogo a empresas e aos xeradores de coñecemento, para que exista unha transferencia bidireccional real e útil que conecte todo o tecido produtivo coa academia”. Quintela, que é presidenta da Plataforma Española de Tecnoloxías de Modelización, Simulación e Optimización nunha Contorna Dixital (PET MSO ED), promotora da iniciativa, resaltou que se trata dunha iniciativa “pioneira en Europa” pois detrás deste portelo único non só estarán entidades académicas de primeira liña, senón tamén equipos de I+D, de grandes empresas como Repsol, Petronor ou BBVA; así como outras máis pequenas como AIS Group, especialista no desenvolvemento de aplicacións de Intelixencia Artificial, e AnySolution, entre outras moitas.
Durante a mesa redonda que pechou o acto houbo unanimidade en canto á necesidade de “que existan este tipo de plataformas que permitan a creación de ecosistemas de innovación aberta, xa que a conexión entre a industria e os centros de coñecemento será fundamental para vertebrar a economía durante os próximos anos”. Ademais, fíxose fincapé na “versatilidade das matemáticas”, capaces de influír en numerosos ámbitos empresariais utilizando ferramentas comúns. Todos concluíron que é “clave” crear canles de comunicación que permitan unha maior convivencia entre ambas as partes, “para que a transferencia de coñecemento inflúa en maior medida no tecido produtivo, favorecendo un maior desenvolvemento social e económico”.