A iniciativa virtual para defender os cabalos salvaxes galegos xa ten arredor de 10.000 apoios
mércores, 10 de outubro do 2012
A
plataforma Change.org, destinada a canalizar o pulo dos colectivos
internautas a prol dunha loita ou arela común, acubilla estes días
unha nova iniciativa galega, logo
de mobilizacións masivas como a relativa á tradución á nosa
lingua de Twitter. Desta volta, o obxectivo é ben distinto e non
ten nada que ver coas redes nin co virtual. Trátase de algo ben
real: os cabalos salvaxes galegos. Segundo nos conta Santiago Bas
López,
o veciño de Pontevedra responsábel desta
nova petición en Change.org, o que se busca con ela é salvar
aos devanditos animais, tamén coñecidos como garranos,
para que pidan seguir sendo silvestres e gozando do seu contorno, nos
montes galegos. A mobilización, até o de agora, xa ten case 10.000
asinantes.
Foi
posta en marcha hai dúas semanas cun obxectivo ben claro: lograr que
o Goberno galego anule a parte do decreto 142/2012 que regula a
devandita especie e os equipara aos animais domésticos. Isto,
sinalan, significa que se “vai
dificultar enormemente a tenencia destes cabalos, encarecéndoa con
taxas e caros microchips identificativos, burocratizándoa e
obrigando a acubillar aos animais en pastos rexistrados”.
Segundo
se engade, os garranos
teñen “un
alto valor biolóxico nos nosos montes, e constitúen unha das poucas
poboacións de cabalos salvaxes que fican no mundo, amais de ser a
máis grande de todas”.