A impresión 3D será o eixo motor do segundo faladoiro do proxecto Faite Dixit@l!

O vindeiro xoves, 13 de novembro, Compostela acollerá o segundo Faladoiro Dixital do proxecto Faite Dixit@l!, que organiza a Axencia para a Modernización Tecnolóxica de Galicia (AMTEGA) en colaboración con Fundetec. En termos xerais, este encontro xirará arredor de todo o relativo á impresión tridimensional, é por iso que a xornada en cuestión levará por nome Imaxina e crea: impresión 3D.
E en que consiste o proxecto Faite Dixit@l? Estamos perante unha idea da AMTEGA que botaba a andar o pasado mes de setembro, desenvolvida a través dos centros da Rede CeMIT, e encamiñada a mellorar o empoderamento dos usuarios en materia tecnolóxica para favorecer a súa empregabilidade coa tecnoloxía e a Sociedade da Información como base. Faite Dixit@l! achega máis de 1.800 prazas para a participación nas 140 actividades programadas. Amais, ata o vindeiro 28 de novembro está aberto o prazo de inscrición do Primeiro Concurso de Aplicacións Móbiles, que busca recoñecer a creatividade na creación de ferramentas tecnolóxicas que melloren a dispoñibilidade de recursos para a cidadanía e fomenten o uso da tecnoloxía de código aberto neste proceso creativos.
A xornada, na que logo da exposición dos expertos celebrarase un debate sobre o futuro ten a impresión 3D e ata onde pode chegar o seu desenvolvemento industrial, celebrarase entre as 18.30 e as 20.30 horas nas instalacións do Centro de Novas Tecnoloxías de Galicia (CNTG), con entrada libre e de balde ata completar o aforamento da sala. A inscrición ao evento pode realizarse a través da Rede.
Asemade, este Faladoiro Dixital poderá ser seguido vía streaming nas webs da rede CeMIt, do CDTIC, en Twitter coa etiqueta #faladoirosDIX e en Facebook. Na páxina web de Faite Dixit@l! pode solicitarse máis información sobre esta xornada e sobre o resto dos faladoiros que se celebrarán nas vindeiras semanas.
En canto aos relatores, cómpre dicir que estarán presentes:
· Álvaro Rei (enxeñeiro Técnico en Deseño Industrial, pola Escola Universitaria de Deseño Industrial de Ferrol), creador de Galiprint3d, unha das primeiras empresas galegas de impresión 3D que deseña e ensambla os seus propios equipos de impresión en tres dimensións.
· Xoán Sampaiño, freelance, membro de Bricolabs, asociación e grupo de divulgación e fomento de tecnoloxías libres, e do Proxecto Clone Wars, unha das comunidades RepRap máis amplas do territorio hispanofalante.
· Pablo Gajino, socio fundador e CEO de Possible Inc, start-up galega que desenvolve aplicacións móbiles e produtos software e hardware a medida.
· Luís Mandayo, Enxeñeiro Industrial pola Universidade de Vigo, fundador da empresa Lupeon, que achega servizos de asesoramento e de impresión 3D baixo demanda.
· Luís González, responsable de Ardentia, empresa adicada ao deseño 3D e prototipado rápido encamiñado á realización de xoias.
E indo de novo ao ciclo de Faladoiros Dixitais de Faite Dixit@l!, dicir que abrangue cinco eventos: un sobre innovación social dixital desenvolvido baixo metodoloxía PechaKucha, celebrado o pasado 28 de outubro (o vídeo do evento xa está dispoñible), dous seminarios de expertos, este sobre Impresión 3D e un previsto para decembro sobre o Internet das cousas, e dúas xornadas de exposición de casos de éxito sobre aplicacións móbiles e identidade dixital e marca persoal.