A galega Troposfera presenta unha aplicación de balde para coñecermos a calidade do ar
luns, 29 de setembro do 2014
O ar das nosas cidades
amosa niveis de gases nocivos e metais pesados en suspensión, por
mor do tráfico rodado principalmente, que se ben non chegan a ser
tan preocupantes como o das grandes urbes estatais, si que deben ser
tidos en conta. E se non hai unhas administracións que nolo advirtan
e leven a cabo medidas para frear eses niveis, ben está que se usen
as novas tecnoloxías para teren informados aos cidadáns do estado
no que se atopa un elemento co que teñen por forza que vivir: o
aire. Aí, nesa preocupación medioambiental e nesa arela de fornecer
recursos tecnolóxicos útiles á sociedade, é onde se insire a
actividade da empresa galega
Troposfera, que vén de lanzar unha aplicación de balde para
coñecer a calidade do ar que respiramos.
E lembran que non se
trata dun problema livián: hoxe en día a contaminación atmosférica
produce 16.000 mortes prematuras ao ano. Ou sexa, dez veces máis cá
mortalidade por accidentes de tráfico.
Segundo nos contan, un
dos elementos que impiden dar cumprida visibilidade a este problema é
sen lugar a dúbidas a súa propia invisibilidade. É dicir: como
saber cos medios sensoriais que temos ao noso alcance que o ar que
respiramos está ou non contaminado? Ben, en moitas ocasións é
doado sabelo e calquera persoa que viva nunha cidade sabe onde atopar
a mellor calidade atmosférica (lonxe dos lugares onde pasa máis
tráfico e dos complexos industriais, evidentemente). Porén, hai
unha ampla marxe de incerteza e para permitirnos clarificala é para
o que xorde precisamente a ferramenta desenvolvida pola empresa
galega, con sede en Ferrol e especializada na aplicación de
tecnoloxías para o medio ambiente e o sustentábel.
Troposfera, dirixida por
José Manuel Vellón, David Cartelle e Anxo Rodríguez, pon a
disposición da cidadanía unha app de balde para dispositivos
móbiles que permite consultar a calidade do aire en calquera punto
de España. E lévao a cabo, informan, “a través dun sistema
matemático novo de predición da polución do aire que ofrece datos
cada dez quilómetros cadrados e baséase nas cifras de emisións
procedentes, entre outros, dos niveis xerados pola gran industria ou
o tráfico rodado”. Segundo conta David Cartelle, a
ferramenta Troposfera QA pode descargarse gratuitamente a través de
Play Store de Google e destaca dela “o seu sinxelo manexo, apta
para calquera persoa, mesmo sen coñecementos informáticos”.
Respecto do seu funcionamento, sinala que a aplicación é quen de
amosar o ICA (Índice de Calidade do Aire) en calquera punto do mapa
estatal a través dun xeolocalizador que permite situar a posición
do usuario. “A partir de aí”, engade, “reflicte diferentes
parámetros ambientais e a ponderación dos devanditos contaminantes
que realiza o sistema matemático dá como resultado a calidade do
aire do punto que desexamos coñecer”.
A súa utilidade final é
alertar aos grupos de risco (anciáns, nenos, enfermos crónicos) das
condicións probábeis de polución e así previr os efectos daniños
na saúde. Ademais, a aplicación tamén permite acceder a ligazóns
coas últimas novas de interese medio ambiental e relacionadas coa
calidade do aire.