A galega Sdweb presentou en Barcelona os seus proxectos deseñados con Drupal

martes, 2 de marzo do 2010 Fernando Sarasketa

Sitio do servizo Dameuntoke do Concello de Narón, deseñada en Drupal

A edición española do encontro tecnolóxico Drupal Camp, especializado no intercambio de información e experiencias arredor do dito xestor de contidos aberto e multifuncional, conseguiu reunir a finais de febreiro en Barcelona a máis de 350 usuarios e deseñadores de programas baseados neste recurso. A xuntanza, que serviu tamén para debater e pór en común as potencialidades do dito xestor de contidos de software libre (que, por certo, xa dá alicerce á páxina web corporativa da Casa Branca, entre outros sitios de renome), contou coa presenza da empresa galega Sdweb – Solucións Dixitais, firma que leva xa dous anos traballando co Content Management System (xestor Drupal) e que conseguiu, ao seu abeiro, poñer en marcha todo tipo de proxectos tecnolóxicos personalizados para os seus clientes (doados de empregar, libres de licenzas e con medre modular) e unha páxina web propia de seu que é como unha tarxeta de presentación do seu traballo sobre a plataforma Drupal.
A xuntanza celebrada en Barcelona, informa a firma galega, contou con relatorios sobre temas tan diversos como a metodoloxía de traballo en proxectos TIC, a escalabilidade do software ou a súa integración con outras ferramentas como Zimbra ou Alfresco, a creación de distribución e produtos, a adaptación a tecnoloxías móbiles ou a realidade aumentada.
Polo que atinxe á achega da firma galega, dicir que se centrou sobre todo na presentación de proxectos deseñados con esta tecnoloxía, como por exemplo as páxinas www.dameuntoke.es (manual interactivo para a supervivencia da mocidade, posta en funcionamento para o Concello de Narón), www.santjoandedeu.edu.es (sitio en liña da escola de enfermería da Universitat de Barcelona) e a propia www.sdweb.es (páxina corporativa propia de seu, onde se dá conta polo miúdo das vantaxes de Drupal e das iniciativas que se poden despregar ao seu abeiro).

PUBLICIDADE