A galega Primux achega unha app que permite ao persoal dunha empresa fichar co móbil
martes, 25 de xuño do 2019
A
empresa galega Primux Tech,
desenvolvedora e fabricante de tecnoloxías con sede na Tecnóple
de Ourense, vén de lanzar unha aplicación móbil que facilita o
día a día dunha empresa en relación aos novos regulamentos
laborais, facendo máis doada a a súa operatividade. En termos máis
concretos, a app permite que os empregados dunha firma poidan
fichar co seu smartphone. A ferramenta diríxese a posibilitar
que as empresas (en especial a PEME) poidan cumprir coa nova
normativa de control obrigatorio da xornada laboral das súas
traballadoras e traballadores.
Segundo
informa a empresa, a ferramenta móbil distínguese no seguinte das
que xa están no mercado: permite fichar co móbil só en caso de
estar a menos de cinco metros do posto de traballo, para garantir a
presenza requirida. Ademais, dispón dunha plataforma desde a que o
administrador pode filtrar os datos por empregado, exportar informes
e editar fichaxes, entre outras funcionalidades, “de maneira moi
sinxela”.
Desde
a tecnolóxica galega, explican que “a aplicación foi deseñada a
raíz do uso que os españois fan dos teléfonos intelixentes”.
Así, partindo da presenza practicamente total destes aparellos na
poboación e dun deseño intuitivo da app en
cuestión, Primux subministrou esta alternativa tecnolóxica
para fichar a través do smartphone como “a máis facilmente
integrábel na rutina dos empregados e na operativa das empresas”.
Segundo o fabricante galego, esta fórmula “evita as aglomeracións
á hora de fichar en dispositivos situados á entrada das empresas e
a memorización e posíbel extravío dos códigos de rexistro por
parte dos empregados”.
A
aplicación está xa dispoñible en Google Play e na App Store, así
como na web de Primux.