A galega Mundo Educarte mostrará as súas solucións tecnolóxicas no CDTIC

mércores, 12 de setembro do 2012 Raquel Noya

O Centro Demostrador TIC de Galicia, en Santiago de Compostela, retoma a súa actividade demostradora de solucións tecnolóxicas este mes de setembro, cunha sesión dirixida á comunidade docente do país, da man da empresa Mundo Educarte S.L.
A firma galega achegará as súas solucións e recursos TIC para facerlle máis doado o labor de ensinar aos mestres e mestras que asistan os vindeiros días 20 e 21 de setembro a esta cita tecnolóxica, que se celebrará en horario de mañá e de tarde.
A sesión do día 20, que se repetirá o 21 para facilitarlle a asistencia ás persoas interesadas, contará coa presenza de diversos expertos na integración das novas tecnoloxías nos métodos de ensino, os cales amosarán aspectos claves para sacarlle o máximo rendemento a unha aula multimedia.
Tamén mostrarán cómo integrar ferramentas e contidos dixitais para acadar clases máis dinámicas e amenas, achegando, ao mesmo tempo, exemplos de casos reais de docentes que usan estes materiais didácticos nas súas clases.
As persoas interesadas en asistir ás sesións poden facelo de balde, inscribíndose previamente na web oficial do Centro Demostrador TIC.
A empresa Mundo Educarte, conta con máis de 7 anos de experiencia no sector educativo, e está especializada na distribución e comercialización de materiais didácticos en diversos formatos, entre os que destacan as pizarras dixitais, proxectores, visualizadores, sistemas de votación electrónicos... así como contidos en formato dixital para o máximo aproveitamento das ferramentas TIC.

PUBLICIDADE