A galega Imatia dá novos pasos na transformación smart das cidades de Brasil
mércores, 6 de marzo do 2019
A
firma galega Imratia segue incrementando a súa presenza no gran
xigante económico de Latinoamérica: Brasil. O
máis recente proxecto da empresa TIC no país vén de centrarse no
concello de Mogi das Cruzes, no estado de São Paulo, que vén de
dar o paso definitivo para converterse nunha Smart City nos
vindeiros anos.
E
farao coa axuda de Imatia, precisamente, e ao abeiro do Projeto
Breogán, que expón a modernización das cidades brasileiras “desde
unha perspectiva que foxe dos ciclos electorais e aposta polo modelo
PPP (Parcería Público-Privada)”, sinala a firma da nosa terra,
engadindo que baixo o paraugas de Breogán xéranse iniciativas a
longo prazo (até 20 anos) nos que se combina investimento público e
privado para converter a cidade obxectivo nunha Cidade Intelixente.
Ademais, faise fincapé en que a transformación sexa eficiente e
sustentábel, e que garanta o retorno a curto, medio e longo prazo
para todos os interesados.
A
primeira fase do proxecto consiste nunha PMI (Procedimento de
Manifestação de Interesse) mediante a cal as empresas de Projeto
Breogán analizarán o estado actual da Prefeitura e deseñarán un
plan de ruta para converter a Mogi das Cruzes nunha Smart City,
incluíndo, entre moitas outras accións, a implantación por parte
de Imatia dunha plataforma de e-Government baseada no seu
produto Cividas, da súa nova solución de goberno intelixente e
doutras solucións departamentais.
“Grazas
á utilización desta plataforma electrónica”, engade Imatia, “os
cidadáns poderán relacionarse coa administración a través de
Internet permitindo xestionar procesos e expedientes de forma remota
xunto cunhas maiores axilidade e transparencia da xestión pública
da cidade”.
Pola
súa banda, a plataforma de Smart Government permitirá
integrar, cruzar, analizar e presentar todos os datos (internos e
externos) dos que dispón a Prefeitura para axudar aos seus
responsábeis na toma de decisións.
O
obxectivo final do proxecto é converter Mogi das Cruzes nunha Cidade
Intelixente con conectividade de última xeración, cobertura Wi-Fi
en toda a cidade con accesos locais de balde para os cidadáns e
seguimento intelixente a través de cámaras de seguridade para velar
pola seguridade das veciñas e veciños. Amais, a idea é integrar
todos os servizos de educación, saúde, seguridade, comunicación e
transporte para que estean dispoñíbeis e conectados de maneira
sinxela co cidadán.
Mogi
das Cruzes únese desta maneira a outras cidades como Valinhos,
Cariacica, Olinda ou Campina Grande nos que Imatia colaborou na súa
evolución cara a modelos smart.
No
Projeto Breogán Imatia colabora con empresas como Breogán
Innovation, SSR Tecnoloxía ou as españolas Ofica e AVA.