A gala de clausura do Festival Amal será retransmitida en directo pola Rede
venres, 28 de outubro do 2011
O Festival de Cine
Amal, dirixido a tender pontes entre a nosa cultura e a cultura árabe, chega esta
fin de semana á súa recta final. Sen ir máis lonxe, este sábado 29 ás 20.00
horas celebrarase a gala de clausura do certame, un acto que reunirá a
personalidades do ámbito cinematográfico, político e social “de gran relevancia”, informa a
organización. Por certo que o devandito evento, que servirá tamén para facer
entrega dos premios aos gañadores, da man da presentadora María Mera, será retransmitido
en directo pola Rede, dende a páxina web
do festival.
Como dixemos, a actriz
e presentadora María Mera será a encargada de conducir a gala. Esta, informa a
organización, promete ser “unha gran
festa do diálogo e a tolerancia, celebrando a gran acollida que tivo o certame
tanto a nivel nacional como internacional por parte do público e medios de
comunicación”. No acto estarán presentes o alcalde de Santiago, Xerardo
Conde Roi, o secretario xeral de Medios, Afonso Cabaleiro, Anxo Currás, concelleiro
de Cultura e Juan Casares Long, reitor da USC. O presidente da Fundación
Araguaney, Ghaleb Jaber Ibrahim abrirá o acto. Ghaleb Jaber Martínez, director
do Festival Amal, será quen o clausure.
Ao longo da mesma
daranse a coñecer os vencedores da novena edición do festival de entre os 37
títulos que se puideron ver durante a última semana no Teatro Principal e a
Galería Caroní da Fundación Araguaney-Ponte de Culturas. Un xurado formado por
recoñecidos profesionais procedentes de Europa e os Países Árabes foron os
encargados de decidir os vencedores nas categorías de mellor longametraxe de
ficción, longametraxe documental, curtametraxe de ficción, curtametraxe documental
e mellores director, actriz e actor.
Tamén se revelará
en curtametraxe gañadora do concurso Amal Express, no que creadores de todo o
mundo realizaron unha curtametraxe sobre a palabra “REVOLUCIÓN” en só 96 horas.
A contía do premio ascende a 500 euros.
Ademais haberá un Premio Especial do Público AMAL 2011
cunha dotación económica de 1.500 Euros e un trofeo. Este premio será decidido
polos espectadores asistentes ao Festival, que depositaron o seu voto nunha
urna habilitada para a ocasión en cada proxección.