A dixitalización será un dos grandes desafíos das bibliotecas públicas galegas
venres, 27 de maio do 2022
O
director
xeral de Cultura, Anxo M. Lorenzo, presentou no Parlamento o II
Mapa de bibliotecas públicas de Galicia, a ferramenta para
diagnosticar necesidades e orientar a acción pública neste ámbito
cultural. O documento, dixo, “constata a positiva evolución destes
centros nos últimos anos”, unha tendencia que tamén se mostra no
ámbito tecnolóxico, con máis servizos en liña e máis recursos a
disposición dos usuarios, por exemplo conexión Wi-Fi. Respecto das
liñas de futuro, a folla de ruta apunta á necesidade de incrementar
a dixilización, a accesibilidade e a proximidade “para chegar a
aqueles territorios que non contan con estes centros”, un aspecto
no que, avanzou, “a Xunta está a ultimar distintas medidas que
permitan estender o alcance das bibliotecas”.
Entre
os temas nos que puxo o foco Anxo Lorenzo atopábase o das políticas
dirixidas ás persoas con discapacidade, “un dos principais retos
que identifica o mapa”. Como recordou, “trátase dun aspecto no
que a Xunta está a traballar xa a través de liñas de axuda para a
mellora das infraestruturas e, con vistas ao futuro, tamén no marco
da futura lei autonómica de cultura inclusiva e accesible”.
Segundo engadiu, “o mapa identifica que, aínda que a meirande
parte das bibliotecas teñen bos resultados en canto á adaptación
física dos espazos (o 64% ten mobiliario e infraestruturas
adaptadas) é preciso afondar en aspectos como a diversificación das
coleccións ou o equipamento, con medidas como lupas electrónicas,
pasapáxinas, monitores adaptados, recursos en braille, lectores de
pantalla, entre outros”.
As
bibliotecas en cifras
No
documento faise saber que as bibliotecas abren unha media de 45 horas
semanais e teñen unha superficie útil de máis de 98.000 metros
cadrados. Máis da metade (o 53%) contan cunha sala específica para
o público infantil. Hai máis de 17.000 postos de lectura e máis de
4.100 postos informatizados ou, o que é o mesmo, 1,7 postos dixitais
por cada 1.000 habitantes. “Trátase dunha cifra por riba da media
española onde a media está en 0,6 ordenadores de uso público
dispoñíbeis nas bibliotecas por cada 1.000 habitantes”, sinalou
Lorenzo, engadindo que “os centros bibliotecarios adáptanse tamén
cada vez máis aos criterios de sustentabilidade. xa que o 64% delas
adáptanse ás solucións de aforro enerxético”.
O
desafío dixital
Anxo
M. Lorenzo recordou que a adaptación á contorna dixital será outro
dos retos. “Require dunha continua innovación para que estes
centros non queden fóra da realidade polo que, ademais, agora
reforzaremos os nosos esforzos para que as bibliotecas xoguen un
papel primordial na loita contra a fenda dixital e na alfabetización
dixital”, indicou. Para o representante da Consellería de
Cultura, o II Mapa de Bibliotecas de Galicia serve “para
poñer de manifesto as fortalezas e eivas dos servizos bibliotecarios
da rede e, en consecuencia, reviste unha especial utilidade para
fixar prioridades e obxectivos de cara ao futuro”. E engadiu:
“Cómpre agora que tanto as entidades responsábeis dos servizos
bibliotecarios como a Xunta teñamos en conta estes contidos á hora
de levar a cabo a súa planificación estratéxica”.