A divulgación científica, eixe dos novos encontros de normalización do CCG
mércores, 3 de abril do 2019
Este
xoves comezan na Cidade da Cultura os Encontros para a Normalización
Lingüística. A
cita, organizada polo Consello da Cultura Galega coa colaboración da
Secretaría Xeral de Política Lingüística, porá o foco na
divulgación científica e nos novos formatos e metodoloxías para
divulgar investigación, achados e coñecemento avanzado. A
presidenta da institución, Rosario Álvarez, inaugurará a xuntanza
ás 16:15 horas. As sesións desta 21 edición das xornadas
desenvolveranse até o venres na Cidade da Cultura. O arrinque virá
da man de Iolanda Fernández Casal, xornalista da Sección de
Ciencia, Tecnoloxía, Natureza e Sociedade do CCG.
Logo,
a primeira das mesas redondas está moderada por Anxos Sobriño e
nela diferentes investigadores falarán das vantaxes de divulgar en
galego. Son Javier Balea que mantén o web Moléculas
en galego; a matemática da USC, Elena Vázquez Abal, e X.
Dosi Veiga, creador do web Ceos
Galegos.
Esta
primeira sesión conta tamén cunha mesa de experiencias para coñecer
como se divulga a ciencia no ensino secundario. Nela falarán os
profesores de iniciativas didácticas como A Axencia Espacial Escolar
galega, o Proxecto Ríos, Xeoclip ou o Fitofaladoiro. Os relatores
desta mesa son: Cibrán Arxibai do IES Losada Diéguez da Estrada;
Xosé Manuel Fernández Castro do IES Maruxa Mallo de Ordes; Camilo
Ojea do CPI Mosteiro Meis e Xacobo de Toro, IES Urbano Lugrís de
Malpica.
A
sesión do venres arrinca con dúas mesas redondas. Unha sobre
Ciencia, muller e lingua que modera Marilar Aleixandre e na
que participan Patricia Conde da Faculdade de Ciências, Universidade
de Lisboa; Marta Piñeiro Núñez do Laboratorios de Investigación
Lilly, Indianápolis-USA; e María D. Mayán do Instituto de
Investigación Biomédica da Coruña. E outra sobre os posíbeis
públicos que analizarán os casos de publicacións especializadas
(Xerais Básicos Ciencia), medios de comunicación (GCiencia e
Efervesciencia) e formatos a medio camiño entre espectáculo e
divulgación (Peripeciencia).
A
mañá complétase con varias mesas de experiencia. Unha para
cooperar para divulgar a ciencia coas iniciativas dos concellos de
Vigo e de Pontevedra: Pontenciencia e Achégate ás ciencias...en
galego. E outra na que falarán da tradución das charlas TED ao
galego e da Galipedia.
Pola
tarde o programa abrangue varios espazos a maiores: na Aula 1 da
Biblioteca e Arquivo de Galicia haberá espazo para un Obradoiro
de Subtitulación en YouTube con Xacobo de Toro; a sala Off.
Cidade da Cultura acollerá o Obradoiro de Edición/Tradución na
Galipedia a cargo de Elisardo Juncal coa presentación de María
Justo.
Xurxo
Mariño, membro da Sección de Sección de Ciencia, Tecnoloxía,
Natureza e Sociedade do CCG, ofrecerá un relatorio titulado As
miñas linguas e mais eu. Algunhas reflexións sobre a mente e a
linguaxe.
As
sesións rematan con retranca: co Discurshow de Vicente Mohedano, que
leva por titulo Voute contar. E, como peche, unhas
conclusións a cargo da presidenta da institución, Rosario Álvarez.