A comarca de Santiago impulsará o galego nas TIC con novas axudas de Política Lingüística

mércores, 31 de xullo do 2019 Redacción

JPEG - 96.4 KB
Ovidio Rodeiro, esta mañá, na clausura dun obradoiro de emprego en Melide

Política Lingüística deu a coñecer este mes de xullo novas axudas para promover o galego, poñendo o foco na mocidade e, tamén, nas ferramentas de comunicación que teñen máis popularidade entre as novas xeracións: as ferramentas tecnolóxico-dixitais. Desta volta, as subvencións consisten nunha ducia de apoios para concellos da comarca de Santiago. A resolución destas contribucións de Política Lingüística foi dadas a coñecer polo delegado territorial da Xunta na Coruña, Ovidio Rodeiro.
Un total de 13 concellos de Santiago e a mancomunidade de Ordes recibirán ditas axudas, que se distribúen entre as entidades locais que as solicitaron, ben a título individual, ben agrupadas con outras, até acadar os 3.000 habitantes mínimos que esixía a convocatoria.
Con esta iniciativa, as entidades beneficiarias prestarán á poboación servizos lingüísticos baixo algunha das tres modalidades obxecto de subvención: a creación dunha unidade técnica de traballo, o mantemento das xa existentes ou a implementación de programas de dinamización lingüística.
A contía asignada a esta comarca é de máis de 50.000 euros.
Con esta resolución, créanse dous novos servizos lingüísticos e apóiase a continuidade da actividade doutras 35 unidades técnicas de traballo que lles dan cobertura a un total de 42 concellos en Galicia.
Segundo explica Política Lingüística, as subvencións contribúen ao financiamento de diferentes programas de dinamización en 35 municipios que reciben a axuda para desenvolver actividades ou campañas de promoción do uso do galego, en concreto aquelas que redunden nos ámbitos da perspectiva de xénero e da igualdade, dos servizos sociais, do tecido económico e empresarial, do deporte, das novas Tecnoloxías da Información e a Comunicación (TIC) e da mocidade, en consonancia co Plan de dinamización da lingua galega no tecido económico 2016-2020 que está a desenvolver a Xunta de Galicia e co Plan de dinamización da lingua galega na mocidade 2019-2022 que a Secretaría Xeral de Política Lingüística presentou recentemente no Parlamento de Galicia.

PUBLICIDADE