A Xbox One estreará mando a distancia o mes que vén

xoves, 20 de febreiro do 2014 Marcus Fernández

A orientación ao consumo multimedia da Xbox One é un dos seus puntos fortes (especialmente en mercados como o norteamericano), pero aínda que dende Microsoft deseñasen o sistema para que respondese axeitadamente a ordes de voz, o público segue a estar máis afeito ao tradicional mando a distancia, de aí que veñan de presentar un novo accesorio para a consola, o Xbox One Media Remote.
Este mando a distancia sairá á venda no mes de marzo (ao parecer o seu prezo en España será de 22,99 euros) e facilitará o control da reprodución de películas en Blu-ray ou de vídeo en streaming, así como tamén contará con botóns específicos para volver á posición anterior dos menús e acceder á guía de programación da consola. Este mando tamén aproveita o sensor Kinect para poder enviar sinais por infravermellos ao televisor para o seu acendido e control de volume, evitando así que teñamos que facer uso de dous mandos a distancia á vez. Para facer máis práctico o seu manexo, conta con botóns retroiluminados que acenden ao detectar movemento, de xeito que resulta doado empregar o mando cando estamos a escuras vendo unha película ou xogando.

O mando a distancia busca un control moi sinxelo da Xbox One durante o consumo de contidos multimedia

PUBLICIDADE