A UVigo lanza un manual para clarificar a linguaxe informática VHDL
xoves, 17 de xaneiro do 2019
- O docente da Universidade de Vigo Carlos Castro
A
Universidade
de Vigo vén de presentar un manual para enxeñaría que mostra os
conceptos básicos da linguaxe informática VHDL, un dos códigos
máis salientábeis a nivel internacional no eido da descrición de
soportes físicos. O manual, dispoñíbel para consulta, vén da man
do docente do Departamento de Tecnoloxía Electrónica da
Universidade de Vigo, Carlos Castro, e o enxeñeiro de Cesinel, José
Benito Castro.
Segundo
fan saber os irmáns Castro, trátase dun instrumento clarificador:
pon ao alcance do común dos estudantes as cuestións teóricas e
prácticas relativas ao deseño e construción dos sistemas dixitais,
facendo máis accesíbel a descrición de hardware. O manual titúlase
VHDL sintetizable para estudiantes de Ingeniería.
Os
motivos que levaron a edición deste libro, editado polo Servizo de
Publicacións da Universidade de Vigo, son dous. Por unha banda, a
pretensión era a de “elaborar un manual de apoio para o alumnado
dos graos de enxeñaría no que estivera toda a información que non
da tempo a contar nas clases”, nas que se empregan 185 diapositivas
para ensinar a describir a linguaxe VHDL. O profesor Carlos Castro
explica que “hai información que se explica oralmente e o alumnado
non a ten en conta para os apuntamentos, polo que o seu nivel non é
suficiente para manexar esta linguaxe”.
Por
outra banda, José Castro explica que o obxectivo era ter un
instrumento útil do que botar man no que se refire ao uso da dita
linguaxe: “A ambos, e supoño que a outros moitos enxeñeiros,
ocórrenos que, cando estamos un tempo sen usar a linguaxe VHDL,
esquecemos cousas ou temos dúbidas de como utilizalas
axeitadamente”, explica, engadindo que a resposta ao devandito foi
“publicar un libro no que se puidesen consultar as dúbidas sen ter
que ler moreas de páxinas ou sen ter que pescudar en diversas fontes
por mor de non atopar unha explicación ou un exemplo”.