A UVigo estará na final do desafío de robótica libre ASTIChallenge

martes, 2 de abril do 2019 Redacción

A Universidade de Vigo é finalista no desafío de robótica móbil ASTIChallenge, unha competición de balde centrada en impulsar novos xeitos libres, argalleiros e participativos de traballar e desenvolver enxeños. Logo de varios meses de fases previas, a vindeira fin de semana celebrarase a fase final en Burgos, na que a institución viguesa estará representada polo equipo GCode Robotics, xunto con outros 14 finalistas de universidades e centros de FP superior.
Fernando Flores, do grao en Electrónica Industrial e Automática, especialidade en electrónica industrial; David Fernández, Miguel Salvatierra e Ánxel o grao en Tecnoloxías Industriais compoñen o equipo vigués, que se estrea con esta iniciativa na liga de competicións de calibre. Segundo fan saber, trátase dunha competición na que se reta aos grupos de desenvolvedores a construír e programar un robot para que realice diversas probas, como moverse por unha mini-fábrica carrexando un palé de maneira autónoma e comunicándose sen fíos coa súa contorna. O equipo vigués engade que a través deste tipo de desafíos, as alumnas e alumnos participantes traballan competencias das áreas de tecnoloxía, programación e robótica, mellorando as súas habilidades na xestión de proxectos, o emprendemento, a innovación e a creatividade. A iniciativa vén da man da empresa ASTI Mobile Robotics.
En total, na fase final do desafío ASTIChallenge participan 66 equipos, dos cales 15 pertencen á modalidade de universidade e FP superior. Nesta categoría entregaranse catro galardóns: mellor xestión de proxecto; mellor rendemento no torneo; mellor robot no duelo de robots e mellor centro educativo. O premio para a categoría de universidades é a realización de prácticas remuneradas na empresa ou un curso de formación en robótica móbil.
De face a fase final, o equipo vigués competirá con Bumblebee, un robot de código aberto cuxo miolo e deseños 3D será publicado na plataforma GitHub. O corpo foi impreso en 3D e para o control empregaron unha placa Arduino Nano cun microcontrolador ATMega328. Amais, conta con catro sensores infravermellos de distancia e unha matriz de oito sensores de contraste, e unhas antenas de radiofrecuencia para as comunicacións coa contorna e un acelerómetro e xiroscopio.

PUBLICIDADE