A UVigo amosa un completo manual sobre o poder das TIC para favorecer unha educación inclusiva
mércores, 16 de xullo do 2014
- A profesora da Facultade de Ciencias da Educación Esther Martínez-Figueira
Quen máis quen menos
sabe a estas alturas que as novas tecnoloxías da información, ben
levadas, potencian o ensino e favorecen a adquisición de
coñecemento, sobre todo grazas ás novas linguaxes e niveis de
interacción que introducen. Porén, as TIC aínda non dixeron a súa
derradeira palabra en materia de beneficios para o ensino. De feito,
só vimos a punta do iceberg, unha boa parte do seu potencial docente
fica aínda debaixo. Así o entende a profesora do campus de
Pontevedra (Facultade de Ciencias da Educación da UVigo) Esther
Martínez-Figueira, que
está a coordinar un libro sobre as TIC nas aulas que tenta amosar o
máximo posíbel do que até o de agora permanecía baixo a liña de
flotación. Por exemplo, o seu poder de cohesión social.
A investigación da que
estamos a falar titúlase TIC para a inclusión de alumnado con
necesidades específicas e de apoio educativo e
vén da man do Servizo
de Publicacións da Universidade de Vigo. Ao seu abeiro compílanse
experiencias que amosan como as Tecnoloxías da Información e da
Comunicación (TIC) poden axudar “a superar as limitacións e a
procurar a autonomía” das persoas con necesidades educativas
específicas. Segundo explica a profesora, “na escola desenvólvense
determinados procesos que favorecen a inclusión e, á súa vez,
outros procesos que contribúen ou poden fomentar a exclusión e a
marxinación, de aí a importancia que neste volume se lle outorga ás
prácticas educativas inclusivas”. Estas prácticas son, para
Martínez-Figueira, “o medio máis eficaz para combater as
actitudes discriminatorias”, un labor de combate que as TIC,
sinala, poden desenvolver á perfección. De feito, di, están xa
probados e demostrados os seus beneficios na procura dunha educación inclusiva, favorecendo a comunicación entre compañeiros e co
profesorado e achegando marxe para a formación individualizada e
adaptada ás características de cada quen. Ao remate de todo isto,
explica, mesmo se pode loitar de cheo contra o fracaso académico e
persoal.
No manual que coordina Martínez-Figueira tamén
participan Manuela Raposo, Isabel Doval, Antía García, Tania
Garrido, Lourdes Estévez, Ana Belén Salgado, Sheila Caride e
Fernando Tellado. Segundo fan saber os responsábeis da obra, o seu
obxectivo foi fornecer “un punto de referencia para o uso activo
das TIC no ámbito do ensino”, dirixido tanto a persoal docente
como ao alumnado, así como aos familiares de persoas con necesidades
especiais de apoio educativo.