A USC resolve o certame de subtitulado de vídeos científicos ao galego TraduceTED

A USC resolveu a décima edición do certame #traduceTED2024 para recoñecer a calidade da subtitulado ao galego de charlas e vídeos TED de divulgación científica. Paola Costa Villanueva, polos subtítulos En busca da materia invisible que forma o universo, elaborados para o vídeo The search for the invisible matter that shapes the universe, de Chanda Prescod-Weinstein, obtivo o primeiro premio na modalidade A, dirixida á comunidade universitaria.
Pola súa parte, María Suárez Seijas, polos subtítulos Unha sinxela pregunta que podería mellorar a saúde das mulleres, elaborados para a peza 1 simple question that could improve women’’s health, de Meryam Sugulle, acadou o primeiro posto na categoría para participantes que non pertencen á USC (modalidade B). Cada unha das gañadoras, recibirá un premio de 300 euros.
Na modalidade A, tamén resultou novamente premiada Paola Costa Villanueva, que obtivo o segundo premio nesta categoría polos subtítulos As matemáticas poden axudar a revelar as incógnitas do cancro?, elaborados para o vídeo Math can help uncover cancer’’s secrets, de Irina Kareva. Este premio está dotado con 250 euros. Finalmente, o terceiro galardón da modalidade centrada na comunidade da USC, dotado con 200 euros, recaeu en Rosa María Peña Crecente, polos subtítulos Por que non se pode meter metal no microondas?, elaborados para o vídeo Why can’’t you put metal in a microwave?, de Aaron Slepkov.
No marco da categoría dirixida a participantes alleos á USC, resultou premiado co segundo galardón de 250 euros, Diego Rodríguez Vila, polos subtítulos de Un plan audaz para renaturalizar a Terra a escala masiva, elaborados para o vídeo A bold plan to rewild the Earth — at massive scale, de Kristine McDivitt Tompkins.
Máis información sobre a décima edición do certame e as anteriores na web do concurso.
A orixe desta iniciativa está no concurso #TEDSaúde, impulsado hai oito anos polo Servizo de Normalización Lingüística da USC para promover o subtitulado en galego de charlas e vídeos TED de ciencias da saúde, que ampliou a proposta, co gallo da décima edición, ao lexendado de vídeos TED de divulgación científica en calquera ámbito, cambiándolle o título a #traduceTED.