A USC pon en funcionamento a súa Sede Electrónica
martes, 18 de xuño do 2013
- Claustro de Fonseca da USC coa estatua de Alfonso de Fonseca
Malia ter moitos
departamentos e servizos especialmente envorcados na Rede, amais de
manter unha web (usc.es) de gran
utilidade para a comunidade estudantil e cidadanía en xeral
(remodelada
en 2010 seguindo criterios estritos de accesibilidade, segundo
informaron os responsábeis do proceso), o certo é que a
Universidade de Santiago non contaba oficialmente con Sede
Electrónica. Dito doutra maneira: a USC xa hai anos que reside tamén
na Rede, pero esta ampliación ao dixital non tiña carta de
oficialidade, extensión global (no espazo e no tempo), arela única
e integradora, nin espazo concreto de seu. Agora, desde esta semana,
si que podemos falar de Sede
Electrónica da USC, unha
oficina virtual de atención a usuarios/as en Internet a calquera
hora, todos os días do ano.
A Sede diríxese a
membros da comunidade universitaria e á cidadanía que desexen
“realizar as súas xestións coa USC a través de Internet coa
mesma validez que de xeito presencial”. Funcionará, informa a
institución compostelá, de conformidade cos principios de
responsabilidade, integridade, accesibilidade, seguridade,
veracidade, calidade e actualización de información e servizos.
“Coa implantación da sede electrónica”, engaden fontes
da Universidade compostelá “o que se pretende é
facilitar o acceso aos seus servizos ao tempo que crear un espazo de
relación coa cidadanía no marco dunha xestión administrativa coas
garantías necesarias, diferenciando o concepto de portal de
comunicación do de sede electrónica”. Polo tanto, a a partir
de agora, estar na web sede.usc.es será exactamente o mesmo que
estar nun emprazamento oficial da USC, nunha prolongación de seu ou,
mellor dito aínda, na USC mesma, sen as limitacións de tempo e
espazo que acompañan, de xeito inevitábel, as nosas visitas ou
comunicacións ao xeito tradicional (presencial). E coa vantaxe da
interacción. Segundo explica a institución educativa, a web usc.es
terá agora un claro compoñente institucional, de información xeral
sobre a Universidade, mentres que a sede electrónica establecerá un
marco de comunicación e interacción coa cidadanía en relación cos
servizos electrónicos prestados pola Universidade.
A través da Sede
Electrónica accederase á información dos procedementos,
realización de trámites, presentación de documentos no rexistro
electrónico, formulación de queixas e suxestións, consulta do
taboleiro de anuncios da USC ou verificación de documentos
electrónicos expedidos pola Universidade. “Para completar o
conxunto”, engaden dende a Universidade, “o certificado da
Sede garante o acceso aos seus contidos con seguridade”.
O catálogo de produtos
inicial que ofrece a USC en formato de Administración Electrónica
inclúe procedementos para persoal docente e investigador e de
administración e servizos, estudantes e cidadanía en xeral que
poderá acceder á solicitude de certificacións automatizadas no
ámbito da Oficina de Investigación e Tecnoloxía e a procedementos
no ámbito da Xestión Académica (admisión para realizar estudos,
expedientes académicos, recoñecemento de estudos, cambios ou
certificacións e acreditacións, entre outros).