A USC achega un seminario sobre as posibilidades empresariais do blockchain
mércores, 5 de agosto do 2020
A
Universidade de Santiago vai achegar un seminario baseado nunha das
tecnoloxías de meirande proxección, hoxe en día, para acadar unha
Rede segura e de confianza para todo tipo de operacións,
transaccións e comunicacións: a tecnoloxía de cadea de bloques.
Trátase
do seminario A formación en blockchain: o futuro xa está aquí,
impartido polo grupo de
investigación GAME-IDEGA da USC,
ao abeiro do proxecto internacional DLT4All. Para quen non o saiba, a
tecnoloxía de cadea de bloques consiste basicamente en libros
de contabilidade electrónicos para seren compartidos abertamente por
moreas de usuarios e que gravan todas as transaccións que se apuntan
neles e sen que haxa xeito de modificalas. Teñen unha gran utilidade
para o uso de moedas virtuais ou para facer seguimento exhaustivo de
produtos.
O
obxectivo deste encontro é presentar o currículo elaborado por
DLT4All e os casos de estudo asociados ao programa, así como
proporcionar información sobre os diferentes cursos piloto que se
desenvolverán de xeito aberto e gratuíto a partir do próximo mes
de setembro.
O
evento, moderado por Manuel Fernández Grela, do Departamento de
Fundamentos da Análise Económica e participante no proxecto, conta
ademais con profesionais de perfís diversos como o presidente de
AGALBIT (Asociación Galega de Blockchain e IoT), Antonio Comesaña;
o xerente do Clúster de Madeira e o deseño de Galicia, Ricardo
González; e o especialista en blockchain de The Telescope
CTIC, Emilio Tereñes, que presentarán casos de uso da tecnoloxía
relacionados coa rastrexabilidade de dos produtos nas cadeas de
valor. A
inscrición neste evento pode formalizarse nunha ligazón xa
habilitada.
O
proxecto DLT4All pretende crear un programa de ensino universitario
baseado no blockchain que posibilite impartir formación de
alta calidade neste eido en concreto tanto na USC como noutras
universidades europeas. Fernández Grela sinalou que o obxectivo é
“involucrar aos beneficiarios potenciais do programa nun proceso de
co-creación do seu deseño, elaborado tanto dende a universidade
como dende o mundo no que se manexan estas tecnoloxías, para que o
produto educativo final se axuste á demanda e necesidades dos
emprendedores e investidores”.
