A USC abre o prazo para votar no certame para escolares D3mobile Metrology League

martes, 28 de maio do 2013 Redacción

O grupo de investigación USCAN3D da USC (Universidade de Santiago de Compostela) en colaboración coa Fundación Española para a Ciencia e a Tecnoloxía (FECYT) e outras entidades públicas e privadas anuncian a apertura do prazo para votar os mellores modelos 3D de precisión desenvolvidos polos escolares de todo o país coa axuda dos seus teléfonos móbiles co gallo de competir no campionato científico coñecido como D3mobile Metrology League. É preciso sinalar que o dito concurso permitiu aos participantes de 4º da ESO e de BAC aprender a desenvolver modelos 3D de precisión cos seus móbiles a través de e-learning, pois este programa formativo achega aos escolares as ferramentas precisas para investigar e descubrir como obter bos resultados métricos e visuais, como sinalou o coordinador deste proxecto e membro do grupo de investigación USCAN3d da USC, Juan Ortiz.
Indo ao miolo desta nova, o proceso de votación pública dos modelos 3D de precisión feitos por escolares está aberto a todo o público interesado, que poderá emitir a súa cualificación até o vindeiro 16 de xuño a través dunha web habilitada para a ocasión. Os votos emitidos polo público serán os que determinen os gañadores da primeira edición deste campionato, que persegue fomentar as vocacións científicas entre os escolares. Asemade, como en toda competición haberá premios, tamén para os participantes nas votacións, que entrarán no sorteo dun i-Pad e outros agasallos tecnolóxicos.
Segundo verbas de Juan Ortiz -profesor da Escola Politécnica de Lugo e coordinador deste proxecto- é preciso salientar que o feito de someter os traballos dos/as estudantes ao ditame da opinión pública é un xeito de achegar a ciencia aos cidadáns.

PUBLICIDADE